Category: समसमायिक

मसिंर ४ आईतबार, काठमाण्डाै । प्रतिनिधिसभा र प्रदेशसभा सदस्य निर्वाचनका लागि मतदान सुरु भएको छ । मतदान बिहान ७ बजेदेखि प्रारम्भ भएको हो । याे अपराह्न ५ बजेसम्म हुनेछ । मतदानमा सहजताका लागि ज्येष्ठ नागरिक, अपाङ्गता भएका व्यक्ति तथा अशक्त र गर्भवती लगायतलाई प्राथमिकता साथ मतदान दिन लगाउने व्यवस्था गरिएको छ । मतदान केन्द्रमा महिला मतदाताको सङ्ख्या समेत उल्लेख्य रुपमा देखिएको छ । मतदाताले निर्वाचनका लागि तयार गरिएको चार वटा बेग्लाबेग्लै मतपत्रमा स्वस्तिक छाप लगाई मतदान गर्नुपछ । निर्वाचनमा मताधिकार प्राप्त मतदाता संख्या एक करोड ७९ लाख ८८ हजार पाँच सय ७० रहेकाे छ । निर्वाचनका लागि १० हजार आठ सय ९२ मतदानस्थलमा रहेका २२ हजार दुई सय २७ मतदान केन्द्र कायम गरिएको छ ।

कार्तिक ३० बुधबार, काठमाण्डाै । नेपाली दर्शकले टेलिभिजनमा विश्वकप हेर्न पनि शुल्क तिर्नुपर्ने भएकाे छ । मिडिया हबले ग्राहकसँग विश्वकप प्रसारणका लागि पाँच सय रुपैयाँ उठाउने निर्णय गरेको थियो । उक्त निर्णयका विरुद्धमा अधिवक्ता किशोर पौडेलले सर्वोच्च अदालतमा रिट निवेदन दायर गर्नुभएको थियो । रिट निवेदनमा राष्ट्रिय प्रसारण नियमावलीमा सरकारले बाहेक रकम तोक्न नपाउने व्यवस्था विपरीत मिडिया हबले गरेको निर्णय रोक लगाउन आदेशको माग गरिएको थियो । केबल टेलिभिजन लिएबापत तिर्नुपर्ने सेवा शुल्क तिरेर सहजै विश्वकप हेर्न पाइने व्यवस्था रहेकामा निजी कुनै कम्पनीले त्यस्तो निर्णय गर्न नपाउने रिट निवेदनमा थियो । कात्तिक २२ गते सर्वोच्च अदालतका न्यायाधीश प्रकाशमान सिंह राउतको इजलासले विश्वकपका नाममा विज्ञापन बापत प्रतिग्राहक पाँच सय रुपैयाँ उठाउने निर्णय कार्यान्वयन नगर्न अल्पकालीन अन्तरिम आदेश गरेको थियो ।

तर कार्तिक ३० गते न्यायाधीशद्वय प्रकाशकुमार ढुङ्गाना र डा मनोजकुमार शर्माको संयुक्त इजलासले उक्त रिटमा सुनुवाई गर्दै विश्वकप फुटबल प्रतियोगिताका नाममा कुनै पनि रकम नउठाउन दिएको अल्पकालीन अन्तरिम आदेशलाई निरन्तरता दिन अस्वीकार गरेको छ । नेपालमा विगत लामो समय देखि विश्वकप फुटबल प्रतियोगिताको टेलिभिजनमा विभिन्न च्यानलले प्रत्यक्ष प्रसारण गर्दै आएका थिए । यस भन्दा अघिका विश्वकप संस्करणहरू सजिलै हेर्न मिल्ने व्यवस्था रहेकोमा यस पटक छुट्टै शुल्क तोकिएको छ ।

कार्तिक २९ मंगलबार, काठमाण्डाै । श्रम, रोजगार तथा सामाजिक सुरक्षा मन्त्रालयले श्रम स्वीकृतिको अवधि समाप्त हुनु अगावै आफू कार्यरत मुलुकबाट श्रम स्वीकृति नवीकरण गर्न वैदेशिक रोजगारीमा रहेका सम्पूर्ण श्रमिकलाई आग्रह गरेको छ । श्रम स्वीकृति नवीकरण नगरेको अवस्थामा वैदेशिक रोजगारीमा रहँदा मृत्यु भएका कतिपय नेपाली श्रमिकका परिवारले पाउने कल्याणकारी सेवा सुविधा उपभोग गर्न नपाएको देखिएको जनाउँदै मन्त्रालयले श्रम स्वीकृतिको अवधि समाप्त हुनु अगावै नवीकरण गर्न आग्रह गरेको हो । जुनसुकै मुलुकमा भए पनि वैदेशिक रोजगार विभागको वेभसाइटबाट श्रम स्वीकृति नवीकरण गर्न सकिन्छ । साथै आफ्नो श्रम स्वीकृतिको म्याद रहे/नरहेको ब्यहोरा विभागको उक्त वेबसाइटमा गई हेर्न पनि सकिन्छ । म्याद समाप्त भएको वा हुने अवस्थामा रहेको श्रम स्वीकृति नवीकरण गर्नुपर्छ । मन्त्रालयका सहप्रवक्ता डा थानेश्वर भुसालका अनुसार वैदेशिक रोजगार कल्याणकारी कोष र बिमा बापत दाखिला गर्ने रकम सम्बन्धित देशमा रहेको आफ्नो बैङ्क खाताबाट नेपालमा रहेको वैदेशिक रोजगार बोर्ड र सम्बन्धित बीमा कम्पनीको खातामा रकम पठाउन सकिने व्यवस्था मिलाइएको बताउनुभयो । सरकारले वैदेशिक रोजगार ऐन, २०६४ संशोधन गरी श्रमिकले आफू कार्यरत मुलुकबाटै श्रम स्वीकृति नवीकरण गर्न सक्ने व्यवस्था गरेको थियो । एकपटक श्रम स्वीकृति लिई विदेशमा रोजगारीमा गएपछि श्रम स्वीकृतिको अवधि कायमै रहेको अवस्थामा नेपालमा फर्की पुनः सोही मुलुकको सोही काममा जाँदा पुनः श्रम स्वीकृति लिनु नपर्ने तर एकपटक लिएको श्रम स्वीकृतिको अवधि समाप्त भएपछि पुनःविदेशमा रोजगारीको लागि जानुपरेमा श्रम स्वीकृति नवीकरण गर्नुपर्ने व्यवस्था छ । वैदेशिक रोजगारीमा जाने नेपाली नागरिकले अनिवार्य रूपमा श्रम स्वीकृति लिनै पर्ने व्यवस्था पनि रहेकाेछ ।

कार्तिक २६ शनिबार, काठमाण्डाै । सञ्चार तथा सूचना प्रविधि मन्त्री ज्ञानेन्द्रबहादुर कार्कीले गठबन्धन संविधानको रक्षा र राष्ट्रिय समृद्धिको लागि बनेको बताउनु भएको छ । सुनसरीको हरिनगरा गाउँपालिका ५ वसन्तपुरमा सञ्चारकर्मीसँगको कुराकानीमा मन्त्री कार्कीले संविधानको रक्षा, सबै जाति, वर्ग, क्षेत्र र समुदायको हक अधिकार स्थापित गर्न प्रतिबद्ध रहेको पनि बताउनुभयो । सरकारका प्रवक्ता समेत रहनुभएका सञ्चार मन्त्री कार्कीले बिचार र अभिव्यक्ति स्वतन्त्रता तथा मुलुकको समृद्धिका लागि वर्तमान सत्ता गठबन्धनको सहकार्य दिगो बन्ने बताउनुभयो । 

कार्तिक २६ शनिबार, काठमाण्डाै । मङ्सिर ४ गते हुन गइरहेको निर्वाचनका लागी मकवानपुर जिल्लाभर खटिने मतदान अधिकृत तथा सहायक मतदान अधिकृतहरूका लागि मतदान सञ्चालन सम्बन्धी तालिम सुरु भएको छ । प्रदेश निर्वाचन कार्यालय हेटौँडाले आयोजना गरेको दुई दिने तालिमपछि कर्मचारीलाई निर्वाचन सामग्री हस्तान्तरण गरेर मतदान केन्द्रमा खटाइने जनाइएको छ । जिल्लाकाे तीन सय ७४ मतदान केन्द्रमा खटिने सात सय २८ मतदान अधिकृत तथा सहायक मतदान अधिकृतसहित थप ७२ जनालाई मतदान सञ्चालनसम्बन्धी तालिम दिन लागिएको हाे । जिल्लामा खटिने सात सय २८ र अरू थप १० प्रतिशत गरी आठ सय जनालाई तालिम दिनु लागेकाे हाे । प्रत्यक्षतर्फका र समानुपातिक उम्मेदवारका लागि मत राख्ने तरिका, भीड नियन्त्रण, मसी लगाउने, नाम रुजु गर्ने, दोहोर्‍याएर मत हाल्न आएमा अपनाउनुपर्ने तरिका, मतदाताले गोप्य रूपमा मतदान गर्न पाउने आफ्नो अधिकारलाई सुरक्षित ढङ्गले प्रयोग गर्नेबारे प्रशिक्षित गराइने छ । साथै मङ्सिर १ गतेसम्म निर्वाचनका लागि खटाइएका सबै कर्मचारी सम्बन्धित मतदान केन्द्रमा पुगिसक्नुपर्ने मुख्य निर्वाचन अधिकृत ऋषिराम निरौलाले जानकारी दिनुभयो । मकवानपुरकाे क्षेत्र नं १ मा एक लाख ५० हजार एक सय ५५ र क्षेत्र नं २ मा एक लाख ५० हजार पाँच सय ७८ मतदाता छन् ।

कार्तिक २६ शनिबार, काठमाण्डाै । नेपाल वायुसेवा निगमले रुपन्देहीको भैरहवास्थित गौतमबुद्ध अन्तर्राष्ट्रिय विमानस्थलबाट अन्तर्राष्ट्रिय उडान गर्ने भएको छ । नेपाल वायुसेवा निगमका प्रवक्ता अर्चना खड्काका अनुसार डिसेम्बरको अन्तिम सम्म भैरहवाबाट अन्तर्राष्ट्रिय उडानको तयारी भइरहेको बताउनुभयाे । हाल निगमका वाणिज्य निर्देशक जनकराज काला खेतीको संयोजकत्वमा समिति गठन भइ उडान सञ्चालनबारे अध्ययन सुरु गरिसकेकाे छ । नेपाल वायुसेवा निगमले भारतका तीनसहित आठ देशका १० गन्तव्यमा अन्तर्राष्ट्रिय उडान गर्दै आएको छ । एयरलाइन्ससँग अन्तर्राष्ट्रिय उडानका लागि दुई थान वाइडबडी ए–३३० र दुई थान न्यारोबडी ए–३२० जहाज छन् ।

गौतमबुद्ध विमानस्थलबाट हाल कुवेतको जजिरा एयरलाइन्सले सातामा तीनवटा उडान गरिरहेको छ । हिमालय एयरलाइन्सले कात्तिक १७ देखि मलेसियाको क्वालालम्पुरका लागि नियमित चार्टर्ड उडान सञ्चालन गर्दै आएको छ । एयरलाइन्सले दैनिक एक चार्टर्ड उडान पनि गरिरहेको छ । २०७१ माघ १ गते तत्कालीन प्रधानमन्त्री सुशील कोइरालाले शिलान्यास गरी निर्माण सुरु भएको थियाे । साथै गौतमबुद्ध अन्तर्राष्ट्रिय विमानस्थल यहि २०७९ जेठ २ गतेदेखि सञ्चालनमा आएको हो ।

कार्तिक २५ शुक्रबार, काठमाण्डाै । प्रमुख निर्वाचन आयुक्त दिनेशकुमार थपलियाले निर्वाचन प्रचारप्रसारमा हुने फजुल खर्च कम गर्न आग्रह गर्नुभएकाे छ । नेपाल टेलिभिजनले निर्वाचन अभिमुखीकरण तथा विषयवस्तु र प्राविधिक तयारीबारे आयोजना गरेको कार्यक्रममा उहाँले फजुल खर्चले वित्तीय अनुशासन उल्लङ्घनका साथै अर्थतन्त्रलाई प्रभावित पार्ने हुन्छ त्यसैले कम खर्चमा मतदाता समक्ष जान दल र उम्मेदवारहरूलाई प्रेरित गर्ने गरी समाचार सम्प्रेषण गर्न सञ्चार माध्यमहरूलाई आग्रह गर्नुभएको छ । उहाले सूचना दिएर जितिन्छ, लुकाएर जितिँदैन भन्ने मान्यताका साथ आयोगले सूचनामा सबैको समान पहुँच स्थापित गर्ने गरी संयन्त्र स्थापना र प्रवाह गरिरहेका बताउनुभयो । त्यसैले मिथ्या सूचना, दुष्प्रचार र द्वेषपूर्ण अभिव्यक्तिको अनुगमन भइरहेकाले गालीगलौज र लाञ्छनायुक्त भनाइलाई रोक्न पाइँदैन भन्ने हिसाबले प्रस्तुत हुनु दुर्भाग्यपूर्ण भएको टिप्पणी गर्नुभयो । प्रमुख आयुक्त थपलियाले जनताको अभिमत प्रकट हुनु पूर्व फलानो उम्मेदवार बलियो वा फलानो उम्मेदवार कमजोर भन्ने ढङ्गले समाचार वा मत सर्वेक्षण गर्न आचारसंहिता बमोजिम नपाइने भएकाले त्यसबाट सजग रहन समेत आग्रह गर्दै मतदानको दिन र मतगणना कार्यको समाचार दिँदा अन्तर्राष्ट्रिय मान्यता अनुरूप तथ्यपरक, सन्तुलित र विश्वसनीय समाचार प्रवाह गर्न आग्रह गर्नुभयो ।

कार्तिक २४ बिहिबार, काठमाण्डाै । उपराष्ट्रपति नन्दबहादुर पुनले चीनकाे ९० प्रतिशत वस्तुमा भन्सार शुल्क शून्य बनाउने नीति हाम्रा लागि राम्राे अवसर रहेकाे बताउनुभयाे । नेपाल चीन उद्योग वाणिज्य सङ्घको २३ औँ वार्षिक साधारणसभालाई सम्बोधन गर्दै उपराष्ट्रपति पुनले नेपाल र चीनबीचको सम्बन्ध आर्थिक कूटनीतिका माध्यमबाट अझै विस्तार र प्रगाढ बन्ने बताउनुभएकाे छ । उनले दुई देशबीचको सम्बन्ध सुदृढ बनाउन निजी क्षेत्रको भूमिका अझै प्रभावकारी रहने पनि बताउनुभयो । यसै महिना देखि लागू हुने गरी नेपाल सहित अतिकम विकसित मुलुकबाट निर्यात हुने ९० प्रतिशत वस्तुमा भन्सार शुल्क शून्य बनाउने चीनले नीति ल्याएकाे छ, जुन हाम्रा लागि राम्रो अवसर रहेकाे यसको नेपालले सदुपयोग गर्नुपर्ने पनि बताउनुभयो । उनका अनुसार हामीले हरेक क्षेत्रमा आत्मनिर्भर हुँदै निर्यातमा वृद्धि गर्नु पर्छ । त्यसका लागि गुणस्तरीय वस्तुको उत्पादन, उत्पादित वस्तुको प्रवद्र्धन, आर्थिक कूटनीति मार्फत अन्तर्राष्ट्रिय बजारमा निर्यात जस्ता कार्यबाट निर्यात व्यापार वृद्धि गर्न सकिन्छ । नेपालको मुख्य व्यापार छिमेकी मुलुक चीन र भारतसँग रहेकाे छ, त्यसैले चीनसँग नेपालको व्यावसायिक सम्बन्ध विकास हुनु नेपालका लागि ठूलो अवसर पनि हो उनले बताउनु भयाे ।

कार्तिक २३ बुधबार, काठमाण्डाै । सर्वोच्च अदालतले विचाराधीन थुनुवा रहेका मुद्दामध्ये ५० प्रतिशत कैद भुक्तान गरिसकेका थुनुवाका मुद्दा पहिचान गरी त्यस्ता मुद्दालाई निश्चित दिन छुट्टै पेसी चढाई सुनुवाइ गर्ने भएको छ । अदालतले त्यस्ता मुद्दाको समूह स्थगित नहुने गरी अभियानका मुद्दासरह पेसी व्यवस्थापन गरी सुनुवाइ गर्ने प्रबन्ध मिलाउने निर्णय सर्वोच्च अदालतको पूर्ण बैठकले गरेको हो । सर्वोच्च अदालत नियमावली, २०७४ को नियम ११३ बमोजिम गठित मुद्दा व्यवस्थापन समितिको सिफारिसबमोजिम यही कात्तिक १६ गते बसेको पूर्ण बैठक (फूलकोर्ट) ले उक्त निर्णय गरेको सर्वोच्च अदालतका प्रवक्ता विमल पौडेलले जानकारी दिनुभयो । सर्वोच्च अदालतमा विचाराधीन रहेका प्रतिवेदनको सुनुवाइ हप्ताको एकदिन शुक्रबार मात्र हुने गरेको थियो । एक दिन १ः३० बजेसम्म मात्र सुनुवाइ गर्दा त्यस्ता प्रतिवेदनको अपेक्षितरूपमा फर्छ्योट हुन नसकी सङ्ख्या बढ्दै गएकाले प्रत्येक हप्ताको शुक्रबारका दिन प्रतिवेदनको सुनुवाइका लागि दुईवटा छुट्टै इजलास तोकी पूरा समय सुनुवाइ गर्ने निर्णय गरेको छ । त्यस्तै, बैठकले तत्कालीन पुनरावेदन अदालत तथा उच्च अदालतमा न्यायाधीशको हैसियतले कार्यरत हुँदा मुद्दाको रोहमा प्रत्यार्थीलाई झिकाउने आदेश गरेको वा अन्तरिम आदेश जारी गरेको भए पनि सर्वोच्च अदालतमा सो मुद्दाको सुनुवाइ गर्नेसमेत निर्णय गरेको छ । सर्वोच्च अदालतमा विचाराधीन मुद्दामा प्रत्यार्थी झिकाउने आदेश गर्दा स्पष्ट राय वा इन्साफमा फरक पर्नसक्ने प्रकृतिको तथ्यमा प्रवेश गरी आदेश गरिएको नभएमा सो आदेश गर्ने तथा अल्पकालीन अन्तरिम आदेश वा अन्तरिम आदेशमा स्पष्ट राय व्यक्त नगरी आदेश जारी गर्ने न्यायाधीशले समेत त्यस्ता मुद्दाको सुनुवाइ गर्ने बैठकले निर्णय गरेको छ ।

कार्तिक २२ मंगलबार, काठमाण्डाै । आज नेपालबाट खग्रास चन्द्रग्रहण देखिने छ ,ग्रहण लाग्ने समयावदि १ घण्टा २३ मिनेट हुनेछ । आज कार्तिक शुक्ल पूर्णिमामा लाग्ने ग्रहण ग्रस्तोदित खग्रास चन्द्रग्रहण हाे । नेपाल पञ्चाङ्ग निर्णायक समितिका अनुसार बेलुकी ०५:११ बजे चन्द्रोदय हुँदादेखि नै ग्रहण लागेर नै उदय हुने भएकाले ग्रस्तोदित चन्द्रग्रहण भनिएको हाे । ग्रहणले पूरै चन्द्रमा ढाक्ने भएकाले खग्रास भनिएको समितिले प्रकाशन गरेको ‘राष्ट्रिय पञ्चाङ्ग’ मा पनि उल्लेख छ । बेलुकी ०५:१३ बजे सूर्यास्त भएपछि ग्रहण स्पष्टरुपमा देखिने छ । बेलुकी ०५:२७ बजे ग्रहणको उन्मीलन हुने समितिका कार्यकारी निर्देशक सूर्यप्रसाद ढुङ्गेलले बताउनुभयो ।

आज हुने चन्द्र ग्रहण उत्तरी-पूर्वी यूरोप, एशिया, अस्ट्रेलिया, प्रशान्त महासागर, हिन्द महासागर, उत्तर अमेरिका र दक्षिण अमेरिकाको अधिकांश भागबाट देखिनेछ।

कार्तिक १५ मंगलबार, काठमाण्डाै । नेपाल पञ्चांग निर्णायक विकास समितिकामा सात जनाको दरबन्दी स्वीकृत गरिएकाे छ । अर्थ मन्त्रालयको स्वीकृतिमा मन्त्रिपरिषद्ले समितिका लागि सात जनाको दरबन्दी कायम गर्ने निर्णय गरेको हो । विसं २०७७ पुस २० गते मन्त्रिपरिषद्ले समितिको गठन आदेश स्वीकृत गरेको थियो । त्यसपछि २०७८ साल साउन १८ गते उक्त गठन आदेश नेपाल राजपत्रमा प्रकाशन भएकाे थियाे । अनि याे गठन आदेश कार्यान्वयनमा आएकाे थियाे । गठन आदेशमा सात जनाको दरबन्दी स्वीकृत गरिएकाे जसमा समितिकाे कार्यालय प्रमुखका रूपमा कार्यकारी निर्देशकले काम गर्ने छ । साथै कार्यकारी निर्देशकले नै समितिको सदस्य सचिवका रूपमा पनि काम गर्ने व्यवस्था रहेकाे छ । गठित समितिमा पञ्चाङ्ग अधिकृत, वरिष्ठ कम्प्युटर सहायक , प्रशासन सहायक, लेखापाल, कार्यालय सहयोगी र चालक एक/एक गरी सात जनाको दरबन्दी कायम भएको छ ।

कार्तिक १५ मंगलबार, काठमाण्डाै । यहि आउँदाे मङ्सिर ४ गते हुने प्रतिनिधिसभा र प्रदेशसभा सदस्यका निर्वाचनका लागि सुरक्षाकर्मी बाहेक दुई लाख ४६ हजार जनशक्तिको प्रबन्ध गरिएको छ । निर्वाचन आयोग ऐन, २०७३ को दफा १९ बमोजिम निर्वाचनको कामका लागि मुख्य निर्वाचन अधिकृत, निर्वाचन अधिकृत, सहायक निर्वाचन अधिकृत, मतदान अधिकृत, सहायक मतदान अधिकृतलगायत आवश्यक देखिएका अन्य पद सिर्जना गरी त्यस्ता पदमा आवश्यकता अनुसार कर्मचारी नियुक्त गर्न वा तोक्न सक्ने व्यवस्था रहेको छ । नेपालको संविधान तथा निर्वाचन सम्बन्धी कानुनमा आयोगको जिम्मेवारी बमोजिम कार्य सम्पादनका लागि नेपाल सरकार, प्रदेश सरकार तथा स्थानीय तहका कर्मचारी वा नेपाल सरकार वा प्रदेश सरकारको स्वामित्व वा नियन्त्रणमा रहेको वा नेपाल सरकारको अनुदानमा सञ्चालित संस्थाका कर्मचारी वा विश्वविद्यालय वा सामुदायिक विद्यालयका शिक्षक वा कर्मचारीलाई खटाउन वा काममा लगाउन सकिने व्यवस्था रहेको छ ।

प्रतिनिधिसभा सदस्य तथा प्रदेशसभा सदस्य निर्वाचन (जनशक्ति व्यवस्थापन) निर्देशिका, २०७९ मा ‘जनशक्ति’ भन्नाले नेपाल सरकार, प्रदेश सरकार वा स्थानीय तहका कर्मचारी वा नेपाल सरकार वा प्रदेश सरकारको स्वामित्व वा नियन्त्रणमा रहेको वा नेपाल सरकार वा प्रदेश सरकारको अनुदानमा सञ्चालित संस्थाका कर्मचारी वा विश्वविद्यालय वा सामुदायिक विद्यालयका शिक्षक वा कर्मचारी सम्झनुपर्छ र सो शब्दले त्यस्तो निकायमा काजमा, करारमा वा ज्यालादारीमा कार्यरत कर्मचारीलाई समेत जनाउने उल्लेख गरिएको छ ।

आयोगको कान्तिपथस्थित कार्यालयमा सञ्चालनमा रहेको समानुपातिक निर्वाचन प्रणालीका मुख्य निर्वाचनको कार्यालयमा ५५, निर्वाचनका लागि गत असोज २० गतेसम्ममा सबै जिल्लामा मुख्य निर्वाचन अधिकृत र निर्वाचन अधिकृतको कार्यालय सञ्चालनमा आइसकेको छ । निर्वाचन सञ्चालन तथा व्यवस्थापनमा खटिने मुख्य निर्वाचन अधिकृतका लागि न्याय परिषद्को सिफारिसमा जिल्ला अदालतका न्यायाधीश र निर्वाचन अधिकृतका लागि न्याय सेवा आयोगको सिफारिसमा न्याय सेवाका रा.प. द्वितीय श्रेणीका कर्मचारीलाई खटाइएको आयोगका सहायक प्रवक्ता ऋषिराम भुसालले बताउनुभयो । मुख्य निर्वाचन अधिकृतको कार्यालयमा मुख्य निर्वाचन अधिकृत एक, सहायक निर्वाचन अधिकृत, (राप. द्वितीय श्रेणी वा सो सरह वा राप. तृतीय श्रेणी वा सो सरह)– एक, लेखा अधिकृत वा लेखापाल (रा.प.तृ. श्रेणी वा सो सरह वा (रा.प.अनं प्रथम श्रेणी वा सो सरह) एक, सहायक कर्मचारी (रा.प.अनं प्रथम श्रेणी वा सो सरह वा रा.प।. अनं द्वितीय श्रेणी वा सो सरह) एकजना रहनेछन् ।

यस्तै कम्प्युटर अपरेटर (रा.प.अनं प्रथम श्रेणी वा सो सरह वा रा.प. अनं. द्वितीय श्रेणी वा सो सरह) एक, सवारी चालक (सवारी साधन भएमा) एक, सहयोगी कर्मचारी (श्रेणीविहीन) दुई, निजी सुरक्षा अधिकारी (पि.एस.ओ.) एकजना गरी नौजना रहनेछन् । निर्वाचन अधिकृतको कार्यालयमा पनि नौजना कर्मचारी दरबन्दी रहने भुसालले जनाउनुभयो ।

प्रतिनिधिसभा सदस्य तथा प्रदेशसभा सदस्य निर्वाचन सञ्चालन (आर्थिक व्यवस्थापन कार्यविधि), २०७९ मा भएको व्यवस्था अनुसार दुई सय ५० सम्म मतदाता भएका मतदान केन्द्रमा मतदान अधिकृत र सहायक मतदान अधिकृत एक–एक जनासहित नौ, दुई सय ५१ देखि पाँच सयसम्म मतदाता भएका मतदान केन्द्रमा मतदान अधिकृत र सहायक मतदान अधिकृत एक–एक जनासहित ११ जना कर्मचारी रहनेछन् । पाँच सयभन्दा बढी मतदाता भएका मतदान केन्द्रमा थप एकजना स्वयंसेवक रहनेछन् । कार्यविधिमा अस्थायी मतदान केन्द्रको पनि व्यवस्था छ ।

मतदान केन्द्रसम्बन्धी खर्च तथा मतदान केन्द्रमा खटिने मतदान अधिकृत लगायतका कर्मचारीलाई दैनिक तथा भ्रमण खर्च भुक्तानी दिने कार्यलाई व्यवस्थित गर्न थप जनशक्ति आवश्यक भएमा निर्वाचन अधिकृतले बढीमा पाँच दिनका लागि मतदान केन्द्रका आधारमा लेखापाल वा सह लेखापाललाई काजमा ल्याउन सक्नेछ ।

यस्तै कम्प्युटर अपरेटर (रा.प.अनं प्रथम श्रेणी वा सो सरह वा रा.प. अनं. द्वितीय श्रेणी वा सो सरह) एक, सवारी चालक (सवारी साधन भएमा) एक, सहयोगी कर्मचारी (श्रेणीविहीन) दुई, निजी सुरक्षा अधिकारी (पि.एस.ओ.) एकजना गरी नौजना रहनेछन् । निर्वाचन अधिकृतको कार्यालयमा पनि नौजना कर्मचारी दरबन्दी रहने भुसालले जनाउनुभयो ।

प्रतिनिधिसभा सदस्य तथा प्रदेशसभा सदस्य निर्वाचन सञ्चालन (आर्थिक व्यवस्थापन कार्यविधि), २०७९ मा भएको व्यवस्था अनुसार दुई सय ५० सम्म मतदाता भएका मतदान केन्द्रमा मतदान अधिकृत र सहायक मतदान अधिकृत एक–एक जनासहित नौ, दुई सय ५१ देखि पाँच सयसम्म मतदाता भएका मतदान केन्द्रमा मतदान अधिकृत र सहायक मतदान अधिकृत एक–एक जनासहित ११ जना कर्मचारी रहनेछन् । पाँच सयभन्दा बढी मतदाता भएका मतदान केन्द्रमा थप एकजना स्वयंसेवक रहनेछन् । कार्यविधिमा अस्थायी मतदान केन्द्रको पनि व्यवस्था छ ।

मतदान केन्द्रसम्बन्धी खर्च तथा मतदान केन्द्रमा खटिने मतदान अधिकृत लगायतका कर्मचारीलाई दैनिक तथा भ्रमण खर्च भुक्तानी दिने कार्यलाई व्यवस्थित गर्न थप जनशक्ति आवश्यक भएमा निर्वाचन अधिकृतले बढीमा पाँच दिनका लागि मतदान केन्द्रका आधारमा लेखापाल वा सह लेखापाललाई काजमा ल्याउन सक्नेछ ।

सोका लागि एक सयसम्म मतदान केन्द्र भएका निर्वाचन क्षेत्रको निर्वाचन अधिकृतको कार्यालयका लागि राजपत्र अनङ्कित वा सो सरहको एक र श्रेणीविहीन वा सो सरहको कर्मचारी एकजना गरी जम्मा दुई, एक सय एकदेखि दुई सयसम्म मतदान केन्द्र भएका निर्वाचन क्षेत्रको निर्वाचन अधिकृतको कार्यालयका लागि राजपत्र अनङ्कित वा सो सरहको कर्मचारी दुई र श्रेणीविहीन वा सो सरहको कर्मचारी एकजना गरी तीन, दुई सयभन्दा बढी मतदान केन्द्र भएका निर्वाचन क्षेत्रको निर्वाचन अधिकृतको कार्यालयका लागि राजपत्र अनङ्कित वा सो सरहको कर्मचारी तीन र श्रेणीविहीन वा सो सरहको कर्मचारी एकजना गरी चारजना रहन सक्नेछन् ।

आयोगले निर्वाचन कार्यालयको मौजुदा जनशक्तिबाट निर्वाचनसम्बन्धी काम समयमा सम्पन्न गर्न नसकिने भएमा निर्वाचन कार्यालयले निर्वाचनको मिति घोषणा भएपछि बढीमा दुई महिनाका लागि कर्मचारी काजमा लिन सक्नेछ ।

काममा नखटाइने कर्मचारी

निजामती कर्मचारी, शिक्षक तथा अन्य सरकारी सङ्घसंस्थासँग सम्बद्ध राष्ट्रियस्तरको ट्रेड युनियनका सङ्घ, प्रदेश र जिल्ला कार्यसमितिका पदाधिकारी, कुनै कर्मचारीको नजिकको नातेदार उम्मेदवार भएमा सो निर्वाचन क्षेत्रमा त्यस्तो कर्मचारीलाई निर्वाचनको काममा नखटाइने व्यवस्था निर्देशिकाले गरेको छ । जनशक्ति व्यवस्थापन निर्देशिकामा कार्यालयको सुरक्षार्थ खटिएका सुरक्षा गार्ड, पाले पहरा बस्ने कर्मचारी र स्वास्थ्य सेवा, विद्युत्, टेलिफोन, बैङ्क, वारुणयन्त्र, खानेपानी जस्ता अत्यावश्यक सेवा प्रदान गर्ने निकायका कर्मचारीलाई त्यस्तो सेवाका लागि वैकल्पिक व्यवस्था नगरी निर्वाचन कार्यमा खटाउनु हुँदैन भनिएको छ ।

कार्तिक १४ सोमबार, काठमाण्डाै । नेपाल नागरिक उड्डयन प्राधिकरण (क्यान) ले अन्तर्राष्ट्रिय चार्टर्ड उडान भैरहवास्थित गौतमबुद्ध अन्तर्राष्ट्रिय विमानस्थलबाट गर्ने निर्णय गरेको छ । प्राधिकरणका महानिर्देशक प्रदीप अधिकारीका अनुसार जेठ २ गते देखि विधिपूर्वक  रुपमा सञ्चालनमा आएको गौतमबुद्ध अन्तर्राष्ट्रिय विमानस्थललाई पूर्णरुपमा प्रयोगमा ल्याउन प्राधिकरणले त्रिभुवन अन्तर्राष्ट्रिय विमानस्थलबाट हुँदै आएका चार्टर्ड उडान अब भैरहवाबाट गर्नुपर्ने निर्णय गरेको जानकारी दिनुभयो ।उहाका अनुसार कूटनीतिक चार्टर्ड उडान, कार्गो उडान र सेनाका उडान चाँही त्रिभुवन अन्तर्राष्ट्रिय विमानस्थलबाटै हुने बताउनु भयाे ।

नेपाल नागरिक उड्डयन प्राधिकरणले कात्तिक १३ गते देखि लागू गरेको हिउँदे उडान तालिकामा चार्टर्ड उडानसँगै काठमाण्डौबाट हुँदै आएका हरेक तीन उडानमा एक उडान समेत भैरहवाबाटै हुने भएकाेछ । प्राधिकरणले नेपाल वायुसेवा निगम र हिमालय एयरलाइन्स सहित तीन विदेशी हवाई कम्पनीलाई हिउँदे उडान तालिका अनुसार गौतमबुद्ध विमानस्थलमा दैनिक एक उडान गर्न निर्देशन दिएको छ । हाल गौतमबुद्ध अन्तर्राष्ट्रिय विमानस्थलमा जजिरा एयरलाइन्सले मात्र हप्ताको तीन उडान गरिरहेको छ ।

कार्तिक १३ आइतबार, काठमाण्डाै । हरेक वर्षझै यस वर्ष पनि कार्तिक शुक्ल चतुर्थी देखि सप्तमीसम्म सूर्यदेवको पूजा, आराधना गरि छठ मनाइँदैछ । यस पर्व शुक्रबार देखि सुरु भएको थियाे । यस पर्वकाे प्रथम दिन कार्तिक शुक्ल चतुर्थीका दिन ब्रतालुहरुले स्नान गरी एक छाक खाएर बस्ने गर्छ । यसकाे दोस्रो दिन कार्तिक शुक्ल पञ्चमीमा षष्ठी मातालाई खरना (सखर हालेर बनाइएको खीर) चढाई प्रसाद स्वरुप ब्रत बस्नेले एक छाक खान्छन् । त्यसपछि कार्तिक शुक्ल षष्ठीका दिन कठोर निराहार व्रत गरी बेलुकी अस्ताउँदो सूर्यलाई पूजा आराधना गरी अर्घ्य दिने गरिन्छ र रातभर जागा बसी कार्तिक शुक्ल सप्तमीका दिन बिहान उदाएकाे सूर्यलाई पूजा आराधना गरी विधिपूर्वक अर्घ्य दिई समापन गरिन्छ ।

छठ पर्व पहिले तराईकाे सिमित क्षेत्रमा मात्र मनाइन्थ्याे भने हाल याे देशकाे बिभिन्न क्षेत्रमा भब्यताका साथ मनाइन्छ । छठपर्वका लागि भनेर राजधानीको गुह्येश्वरीबाट गौरीघाट क्षेत्र, गहनापोखरी, नागरपोखरी, कमलपोखरीलगायत वाग्मती, नख्खु र विष्णुमतीलगायत नदी किनारमा सजावट गरिएको छ । यस दिन सरकारले सार्वजनिक बिदाकाे घाेषणा पनि गरेकाे छ ।

कार्तिक १३ आइतबार, काठमाण्डाै । गृह मन्त्रालयले भारत उत्तराखण्ड प्रान्तको धारचुला क्षेत्रमा सडक निर्माणकाे क्रममा टाउकोमा ढुङ्गा लागि मृत्यु भएकोले पीडितका परिबारलाई उचित राहत र क्षतिपूर्ति उपलब्ध गराउन भारतसँग कुटनीतिक तवरबाट कुराकानी गर्न परराष्ट्रलाई आग्रह गरि पत्राचार गरेकाे छ । उक्त पत्रमा त्यस क्षेत्रमा सडक निर्माण गर्ने क्रममा पर्याप्त सुरक्षा सतर्कता अपनाउन, स्थानीयलाई समेत पूर्व सावधानी अपनाउन र अन्य आवश्यक सुरक्षा र सतर्कताका अपनाइ कार्य गर्न गराउन पहल गरिदिन हुन पनि आग्रह गरेकाे छ ।

भारत उत्तराखण्डको धारचुला क्षेत्रमा कात्तिक ११ गते सडक स्तरोन्नति गर्न ब्लाष्टिङ्ग गर्ने क्रममा दार्चुलाको व्यास गाउँपालिका–२ को दुम्लिङ गाउँमा बस्ने हिक्मत महराको १० वर्षका छोरा पवन महराको टाउकोमा ढुङ्गा लागेर मृत्यु भएको थियाे । उक्त घटनाको थप अनुसन्धान भइरहेको मन्त्रालयले जनाएको छ ।

कार्तिक १३ आइतबार, काठमाण्डाै । कालीगण्डकी करिडोर सडकखण्डमा बस दुर्घटनामा परि पाँच जनाको घटनास्थलमै मृत्यु भएकाे छ । पाल्पाबाट गोरखा जाँदै गरेको ना६ख ७५८० नम्बरको बस नवलपरासीको बुलिङटार गाउँपालिका २ स्थित कालीगण्डकी करिडोर सडकखण्डमा दुर्घटना भएको थियाे । जिल्ला प्रहरी कार्यालय बर्दघाट सुस्तापूर्वका अनुसार दुर्घटनामा पाँच जनाको घटनास्थलमै मृत्यु भएकाे र २४ जना घाईते भएकाे बताइएकाे छ । घाईतेहरुलाई उपचारकाे लागि चितवन अस्पताल लगिएकाे छ । मृतककाे बारेमा थप जानकारि आउन बाँकि रहेकाे बताइएकाे छ ।

कार्तिक १२ शनिबार, काठमाण्डाै । ट्राफिक प्रहरीले बालबालिका राखेर दुई पाङ्ग्रे सवारी साधन नचलाउन सर्वसाधारणमा अनुरोध गरेको छ । काठमाण्डौ उपत्यका ट्राफिक प्रहरी कार्यालयका अनुसार दुई पाङग्रे सवारी साधनमा सवार बालबालिका अत्यन्त जोखिममा रहेको जनाईएको छ । तीव्र गतिमा गुडेका दुई पाङग्रे सवारी साधन अनियन्त्रित भई दुर्घटना हुने र त्यसमा सवार बालबालिकाहरू दुर्घटनाको शिकार हुने क्रम बढ्दो रहेको छ । काठमाण्डाै उपत्यका ट्राफिक प्रहरी कार्यालयका सहायक प्रवक्ता अवदेश विष्ट क्षेत्रीले सुरक्षित तवरले सवारी साधन चलाउन र ट्राफिक नियम पालना गर्न अनुरोध गर्नुभएको छ ।प्रहरीको दुर्घटना कम गर्ने अभियानमा सबैबाट सहयोगको अपेक्षा रहेको पनि प्रहरीले आज एक सूचना जारी गरी जनाएको छ ।

कार्तिक ६ आइतबार, काठमाण्डाै ।आज घर घरमा कागलाई पूजा गरि काग तिहार मनाइँदै छ। याे कार्तिक कृष्ण त्रयोदशीका दिनमा मनाइने गरिन्छ । यस दिन बिहान देखिनै कागलाई यमराजको दूत मानि पूजा गरि मिठाइ तथा अन्य मिठा खानेकुराहरु खान दिएर मनाइन्छ । नेपाल पञ्चाङ्ग निर्णायक विकास समितिका अध्यक्ष प्रा श्रीकृष्ण अधिकारीले बिहान सूर्योदय कालमा त्रयोदशी भएको दिन काग तिहार मनाउनुपर्ने भएकाेले शास्त्र सम्मतरूपमा समितिले आज आइतबार यो पर्व मनाउने निर्णय गरिएको जानकारी दिनुभयो ।

यमराजले लोकको खबर कागका माध्यमबाट थाहा पाउने भएकाले कागलाई यमदूतका रुपमा मान्ने शास्त्रीय विधान रहेको छ । कागले यमराजसमक्ष राम्रो खबर लगिदियोस् भनेर आजका दिन कागलाई पूजा आराधना सहित मीठा–मीठा खान दिई खुसी पार्ने गरिएको हो । यस अवसरमा आजका दिन कागेश्वरी मनोहरा नगरपालिका वडा नं १ स्थित कागेश्वरी महादेव मन्दिरमा विशेष रुपमा पूजा आराधना हुने गर्छ । साथै हनुमानढोकास्थित कागेश्वरी मन्दिरमा पनि कागको विशेष पूजा आराधना गरिन्छ । यस वर्ष तिथिको घटबढका कारण सायंकालमा कार्तिक कृष्ण त्रयोदशी परेका दिन सुरु हुने यमपञ्चक शनिबार बेलुकी देखि नै सुरु भएको थियाे ।

कार्तिक ५ शनिबार, काठमाण्डाै । मङ्सिरमा नेपथ्य ब्यान्डकाे लाइभ कन्सर्ट अब १० शहरमा हुने भएकाे छ । विगत तीन दशक देखि यस ब्यान्डले सङ्गीतको माध्यमबाट सकारात्मक परिवर्तनकालागि सक्रिय भइ कार्य गर्दै आएकाे छ । यसपटक पनि नेपथ्य ब्यान्ड र मानव सेवा आश्रम बिच सहकार्यमा कार्यक्रम हुने भएकाे हाे । सडकमा अलपत्र परेर बेसहारा जिबन बिताइ रहेका नागरिकको उद्धार गर्दै आइरहेको मानव सेवा आश्रमकाे निर्माणाधीन भवन सम्पन्न गर्न र बेसहाराका लागि आपतकालीन कोष स्थापना गर्ने उद्देश्यले साङ्गीतिक यात्रा कार्यक्रम आयोजना गरिने भएको हाे । आश्रमका अध्यक्ष रामजी अधिकारीका अनुसार उक्त लाइभ कन्सर्ट विराटनगर, वीरगञ्ज, हेटौँडा, चितवन, नेपालगञ्ज, धनगढी, सुर्खेत, बुटवल, पोखरा र काठमाण्डाैको भृकुटीमण्डपमा आयोजना गरिने भएकाे छ। हाल उक्त कार्यक्रमको तयारी तीव्र रुपमा भइरहेको पनि बताउनु भयाे ।

अध्यक्ष अधिकारीले विसं २०८२ भित्र नेपाललाई सहयोगापेक्षी सडक आश्रित मानवमुक्त राष्ट्र नेपाल निर्माण गर्ने लक्ष्य लिइ पहल भइरहेको बताउनु भयाे । हाल आश्रमको संरक्षणमा एक हजार पाँच सय बेसहारा, असहाय, घरपरिवार र समाजबाट परित्यक्त व्यक्तिहरुले स‌ंरक्षण पाइरहेका छन् । यस साङ्गीतिक यात्रा कार्यक्रमले संस्था र यसमा आश्रित रहेकाहरुकाे लागि राहत मिल्ने आशा लिइएकाे छ ।आउदाे मङ्सिर १६ गते विराटनगरको हाटखोला मैदानबाट यस साङ्गीतिक यात्रा कार्यक्रम सुरु हुने भएकाे छ । त्यस्तै मङ्सिर १९ गते वीरगञ्जको आदर्शनगर रङ्गशाला, २२ गते हेटौँडाको भुटनदेवी स्कुल मैदान, २५ गते चितवनको क्याम्पाचौर, २९ गते नेपालगञ्ज रङ्गशाला, आगामी पुस ३ गते धनगढी रङ्गशाला, पुस ६ गते सुर्खेतको खुलामञ्च, पुस ९ गते बुटवलको कालिका मानव ज्ञान मावि, १२ गते पोखरा रङ्गशालामा तथा कन्सर्टको अन्तिम कार्यक्रम पुस १६ गते काठमाण्डाैको भृकुटीमण्डपमा हुने भनिएकाे छ ।

असाेज २८ शुक्रबार, काठमाण्डाै । रामपुर नगरपालिका सानीअमराईमा मोटरसाइकल दुर्घटनामा एक वृद्धाको मृत्यु भएको छ । इलाका प्रहरी कार्यालय रामपुरले जनाए अनुसार मृत्यु हुनेमा रामपुर–५ बेझाड बजारकी ७० वर्षीया कोपरी दमिनी थिइन् । उनलाइ उपचारका लागि तानसेन लैजाँदै गर्दा मृत्यु भएको थियाे । प्रहरीले जनाए अनुसार रामपुरबाट स्याङ्जाको दामाचौरतर्फ जाँदै गरेको लु६८प ९९९४ नं‍‌. को मोटरसाइकलले कालीगण्डकी करिडोर सडक अन्तर्गतकाे सानी अमराईमा बाटोमा उनी हिँडिरहेको अवस्थामा ठक्कर दिएको हो । मोटरसाइकलको ठक्करबाट गम्भीर घाइते भएपछि उनलाई रामपुर अस्पतालमा प्राथमिक उपचारपश्चात थप उपचारका लागि लुम्बिनी मेडिकल कलेज तानसेन लगिएकाे थियो । हाल मोटरसाइकल चालक प्रहरी नियन्त्रणमा रहेको छ ।

असाेज २५ मंगलबार, काठमाण्डाै । संस्कृतिविद् एवम् शताब्दी वाङ्मय पुरुष सत्यमोहन जोशीकाे स्वास्थ्य अवस्थामा हाल केही सुधार भएकाे छ । उनलाई ललितपुरकाे ग्वार्को स्थित किस्ट मेडिकल कलेज तथा शिक्षण अस्पतालमा उपचारकाे लागि असोज ७ गते भर्ना गरिएकाे थियाे । हाल जोशी अस्पतालमा उपचाररत छन्। अस्पतालका निर्देशक प्रा.डा.सुरज बज्राचार्यले मुटुको समस्याबाट ग्रसित रहेका जोशीको हाल स्वास्थ्य अवस्थामा सुधार देखिएकाे विज्ञप्ति मार्फत जानकारी दिएका छन्। अस्पतालले मंगलबार दिउँसो २ बजे उनको स्वास्थ्य बुलेटिन जारी गरेको हो। जारी स्वास्थ्य बुलेटिनमा जोशीकाे छातीमा निमोनिया संक्रमण नियन्त्रण गर्न दिइएको एन्टिबायोटिक्स कोर्स जारी रहेको र उनको मुटुको चाल सम्बन्धी समस्यामा पनि केही सुधार देखेको बताइएकाे छ।

असाेज २५ मंगलबार, काठमाण्डाै । गृहमन्त्री बालकृष्ण खाणले नेपालको संविधान अनुसार नागरिकता दिलाउन सरकार प्रतिबद्ध रहेकाे बताउनु भएकाे छ । उनले गैरआवासीय नेपाली सङ्घ दिवसको अवसरमा आयोजित कार्यक्रममा सरकारले नागरिकता सम्बन्धी विधेयक अघि बढाई दुवै सदनबाट पारित भइ राष्ट्रपतिबाट प्रमाणीकरण हुन नसकेको जानकारी गराउनुभयो । मन्त्री खाणका अनुसार कुनै पनि नेपाली नागरिकले नागरिकता विहीन हुन नपरोस् र गैरआवासीय नेपालीले पनि संविधान अनुसार नागरिकता प्राप्त गरुन् भन्ने उद्देश्यले सरकारले नागरिकता विधेयक ल्याएको बताउनु भयाे । साथै उनले गैरआवासीय नेपालीलाई विदेशमा आर्जन गरेको सीप, लगानी र पुँजी नेपालमा भित्र्याउनका लागि आह्वान गर्नुभयाे । सरकारले यसको लागि पुर्ण साथ र सहयाेग प्रदान गर्ने पनि प्रतिबद्धता व्यक्त गर्नुभयो ।

त्यसतै सङ्घका अध्यक्ष कूल आचार्यले सरकारले गैरआवासीय नेपालीलाई नागरिकता दिलाउन गरेको कार्यको प्रशंसा गर्दै थप लगानी मैत्री कानून निर्माणका लागि आग्रह गर्नुभयो । साथै कार्यक्रममा गैरआवासीय नेपालीलाई पनि निर्वाचनमा मतदान गर्ने व्यवस्था मिलाउन आग्रह गर्नुभयाे ।

असाेज २५ मंगलबार, काठमाण्डाै । विधुत प्राधिकरणका कार्यकारी निर्देशक कुलमान घिसिङले विधुत निर्यात एक अर्ब युनिट नाघ्नु हाम्रो लागि कोशेढुंगा रहेकाे बताएका छन् । निर्देशक घिसिङका अनुसार देशभित्र खपत गरी अतिरिक्त भएको विधुत भारतमा निर्यात गरी ७ अर्ब ९३ करोड २२ लाख रुपैयाँ खुद आम्दानी भएको छ । उनका अनुसार मंगलबारसम्म भारतमा एक अर्ब ३० लाख युनिट विधुत निर्यात भएको छ । नेपाल विधुत प्राधिकरणले देशभित्र खपत गरी अतिरिक्त भएको वर्षायामको विधुत गत १९ जेठबाट इन्डियन इनर्जी एक्सचेन्ज लिमिटेडको डे अहेड बजारमा बिक्री सुरु गरेको थियो । प्रतियुनिट औसत मूल्य ७ रुपैयाँ ९१ पैसामा विधुतको निर्यात गरिएको छ । साथै नेपालले भारतसँगको विधुत व्यापारबाट भारतीय रुपैयाँ ४ अर्ब ९५ करोड ७६ लाख भारु नेपाल भित्राएको छ ।

असाेज २५ मंगलबार, काठमाण्डाै । निर्वाचन आयोगले राजनीतिक दल र उम्मेदवारहरूलाई निर्वाचनकाे लागि सामाजिक सञ्जालबाट गरिएकाे विज्ञापन खर्च निर्वाचन सम्पन्न भएपछि कानुन बमोजिम पेस गर्ने निर्वाचन खर्च विवरणमा समावेश गर्न आग्रह गरेको छ । आगामी मङ्सिर ४ गते हुने प्रतिनिधिसभा र प्रदेशसभा सदस्य निर्वाचन अन्तर्गत उम्मेदवारहरूको मनोनयन पत्र दर्ता कार्यक्रम सम्पन्न भए लगतै राजनीतिक दल र उम्मेदवारहरूले सामाजिक सञ्जालककाे पनि प्रयोग गरी प्रचारप्रसार र विज्ञापन गर्न थालिसकेको छ । आयोगले जारी गरेको ‘निर्वाचन व्यवस्थापनमा सामाजिक सञ्जालको उपयोग सम्बन्धी नीति, २०७७’ मा निर्वाचनका सबै चरण, प्रक्रियामा सामाजिक सञ्जालको समुचित प्रयाेग गर्ने बारे ब्यवस्था गरेकाे छ । साथै निर्वाचन आचारसंहिता, २०७९ को दफा १६ मा राजनीतिक दल तथा उम्मेदवारले निर्वाचन खर्च सम्बन्धी पालना गर्नुपर्ने आचरणहरूको व्यवस्था पनि गरिएको छ । आयोगका प्रवक्ता शालिग्राम शर्मा पौडेललेका अनुसार आयोगले प्रतिनिधिसभा र प्रदेशसभा सदस्य निर्वाचन, २०७९ का लागी राजनीतिक दल र उम्मेदवारले गर्न पाउने निर्वाचन खर्चको हद निर्धारण गरिसकेकाे बताउनु भएकाे छ।

असाेज २४ साेमबार, काठमाण्डाै । जिल्ला अदालत काठमाण्डाैले नाबालिग बलात्कार आरोपमा पक्राउ परेका क्रिकेटर  सन्दीप लामिछानेलाई ७ दिन हिरासतमा राखेर अनुसन्धान गर्न अनुमति दिएकाे छ। जिल्ला अदालतले प्रहरीलाई सन्दीप लामिछाने विरूद्द ठाेस प्रमाण जुटाउन हिरासतमा राखेर अनुसन्धान गर्न आज अनुमति दिएको हो ।

दसैँकाे बिदाका कारण अदालत बन्द भएकाेले लामिछानेलाई आज अदालतमा उपस्थित गराएको हो ।  उनी अमेरिकाबाट असाेज २० गते नेपाल फर्किएपछि त्रिभुवन अन्तर्राष्ट्रिय विमानस्थलबाट नै पक्राउ परेका थिए । उनलाई प्रहरी वृत्त गौशालाले अनुसन्धान गरिरहेको छ । राष्ट्रिय क्रिकेट टिमका पूर्व कप्तान लामिछाने विरूद्द भदाै ५ गते काठमाण्डौको एक होटलमा १७ बर्षीया नाबालिगलाई बलात्कार गरेको आरोप सहित भदौ २१ गते प्रहरी वृत्त गौशालामा जाहेरी परेको थियो ।

असाेज २४ साेमबार, काठमाण्डाै । गृहमन्त्रालयले कर्णाली प्रदेशका मुगु, कालिकोट र हुम्लामा बाढी र पहिरोबाट घाइते भएकाको उद्धार तत्काल गर्न गृह प्रशासन, सम्बन्धित जिल्ला प्रशासन र सुरक्षा निकायलाई निर्देशन दिएको छ ।गृहमन्त्रालयले तत्कालका लागि जिल्लामा रहेको स्रोत साधन उपयोग गरेर घाइतेको उद्धार, उपचार र पुनःस्थापना गर्नु पर्ने भए पुनस्थापना गर्न र थप स्रोत साधनको आवश्यकता पर्ने भए मन्त्रालयमा लेखि पठाउन निर्देशन दिएको छ ।

मन्त्रालयले गृहसचिव विनोदप्रकाश सिंह, मन्त्रालयका सुरक्षा समन्वय महाशाखा प्रमुख फणिन्द्रमणि पोखरेल, नेपाल प्रहरीका कर्णाली प्रदेशका प्रमुख प्रहरी नायब महानिरीक्षक पोषराज पोखरेल र सम्बन्धित जिल्लाका प्रमुख जिल्ला अधिकारीहरूलाई निर्देशन दिएकाे हो ।

प्रमुख जिल्ला अधिकारी रोमबहादुर महतका अनुसार मुगुको छाँयानाथ रारा नगरपालिका वडा नं ११ को सालिम भन्ने स्थानमा मानबहादुर कुमाईको घर पुरिँदा ५ जनाको शव प्राप्त भएको र ११ जना वेपत्ता भएको खबर आएपछि नेपाल प्रहरी, सशस्त्र प्रहरी बल र नेपाली सेनाको टोली घटनास्थलतर्फ गएको जानकारी दिनुभयो । सुरक्षा टोली घटनास्थलमा पुग्न ठाँउ ठाँउमा पहिरो गऐकाेले समस्या परेकाे जानकारी दिनुभयो ।

त्यस्तै नेपाल प्रहरीका कर्णाली प्रदेश प्रमुख डिआइजी पोषराज पोखरेलका अनुसार कालिकोटको तिलगुफा नगरपालिका वडा नं ४ राचुली भन्ने स्थानमा मलामीहरूले लास जलाइरहेको अवस्थामा माथिबाट आएको पहिरोले पुर्दा १३ जना बेपत्ता भएको खबर आए लगतै सुरक्षाकर्मीको टोली घटनास्थलमा पुगेको जानकारी दिनुभयो । पहिरो तिला नदीसम्म पुगेको र सुरक्षाकर्मीले बेपत्ताहरूको खोजीकार्य जारी राखेकाे बताउनुभयो । साथै हुम्लाको चखेली वडा नं ६ मेलथममा मानबिर बिकको घर पहिरोले बगाउँदा ९ जना पुरिएकामा ४ जनाको मृत्यु भएको र ५ जनाको जीवितै उद्धार गरिएको , घाइतेहरूलाई थप उपचारका लागि नेपालगञ्ज लैजान हेलिकोप्टर घटनास्थलमा लैजाने तयारी भइरहेको पनि डिआइजी पोखरेलले बताउनुभयो ।

असाेज १८ मंगलबार, काठमाण्डाै । देशभर आज र भोलि वर्षा हुने सम्भावना रहेकाेले मौसम पूर्वानुमान महाशाखाले सबैलाई सतर्कता अपनाउन आग्रह गरेकाे छ । महाशाखाका अनुसार बंगालको खाडीमा विकसित भएको न्यून चापीय क्षेत्रको प्रभाव उत्तरपश्चिमी तर्फ सर्दै जाने क्रममा त्यसको असर नेपालमा पनि परेकाले मौसम बदली भएको हाे। असोज १८ गते नवमीको दिन दिउँसो प्रदेश १, मधेश, बागमती, गण्डकी र लुम्बिनी प्रदेशका केही स्थानमा र बाँकी प्रदेशका थोरै स्थानमा हल्कादेखि मध्यम खालको वर्षा हुने छ र राति लुम्बिनी, बागमती, गण्डकी, मधेश र प्रदेश १ का एक–दुई स्थानमा भारी वर्षाको सम्भावना छ । साथै बुधबार असोज १९ गते दशैंको टीकाको दिन देशभर बादल लाग्ने र गण्डकी, लुम्बिनी, कर्णाली र सुदूरपश्चिममा भारी वर्षा हुने मौसम पूर्वानुनमान महाशाखाले जनाएको छ ।

असाेज १८ मंगलबार, काठमाण्डाै । निर्वाचन आयोगले सूचना सम्प्रेषण प्रभावकारी बनाँउन पैसा नलाग्ने गरि फोनबाटै कुरा गरेर निर्वाचनसँग सम्बन्धित जिज्ञाशा र अन्योलबारे मतदाताका प्रश्नहरु भएमा दसैँलगत्तै समाधान गराउने तयारी गरेकाे छ । आयोगले सञ्चारमाध्यमसँग सहजीकरण गर्न र निर्वाचनबारे सही तथा प्रभावकारी सूचना सम्प्रेषण गर्न यही असोज १४ गतेबाट बहादुर भवनमा प्रेस अफिस स्थापना गरी सञ्चालन गरिरहेको छ । सूचनामा सहजीकरणका लागि आयोग नियमित प्रवक्ता शालिग्राम शर्मा पौडेलका अतिरित्त, समानुपातिक प्रणालीका लागि बेग्लै प्रवक्ता गुरुप्रसाद वाग्ले ,सूर्यप्रसाद अर्याल, ऋषि भुसाल र कमल भट्टराईलाई सहायक प्रवक्ता तोेकेको छ । मुख्य निर्वाचन अधिकृत र निर्वाचन अधिकृतको कार्यालयले नमूना मतदानलगायतको कार्य गरेर मतदातालाई सूचना प्रवाहको कामसमेत गर्नेछन् । आयोगले निर्वाचनका लागि डिजिटल माध्यमलाई बढी प्रयोग गरेर मतदाता शिक्षा सञ्चालनको योजना अघि सारेको छ ।   

साथै निर्वाचन आयोगले आफ्नो वेभसाइट http://www.election.gov.np मा सबै मतदाताको क्रम सङ्ख्या, मतदाता नम्बर, मतदानस्थल, मतदाताको आमा बुबा र पति वा पत्नीको नामसहितको विवरण सार्वजनिक गरेको छ । यहाँ मतदाता नामावली सम्बन्धित प्रदेश, जिल्ला पालिका र मतदान स्थल अन्तर्गत खोजी गर्दा भेट्न सकिनेछ ।    

असाेज १८ मंगलबार, काठमाण्डाै । राष्ट्रपति विद्यादेवी भण्डारीद्वारा महानवमीको दिन नव कन्याको पूजा गर्नुभएको छ । शीलत निवास राष्ट्रपति कार्यालयमा आयोजना गरेको समारोहमा राष्ट्रपति भण्डारीले नव कन्यालाई नवदुर्गाको अवतार स्वरूप मानेर पूजा गर्नुभएको हो । सो अवसरमा नौ जना कन्याहरुकाे राष्ट्रपति भण्डारीले गोडा धोएर, टीका लगाई, उपहार प्रदान गर्नुभयो । ती कन्यालाई बाल मन्दिरबाट लगिएको हो । दसैँ पर्वका अवसरमा महानवमीको दिनमा राष्ट्रपतिले नवकन्याको पूजा प्रत्येक वर्ष गर्दै आउनुभएको छ । उक्त समारोहमा नव कन्याले अन्तिममा नृत्यसमेत गरेका थिए । सो नृत्यको राष्ट्रपति भण्डारीले अवलोकन गर्नुभएको थियो ।

असाेज १७ साेमबार, काठमाण्डाै । बडादसैँको आठौँं दिन आज महाअष्टमीका अवसरमा राष्ट्रपति विद्यादेवी भण्डारीले काभ्रेपलाञ्चोकको पाँचखाल नगरपालिका–९ स्थित पलाञ्चोक भगवती मन्दिरमा दर्शन एवं पूजाआज गरेकी छन्। आजका दिन राष्ट्रप्रमुखबाट पलाञ्चोक भगवती मन्दिरमा दर्शन एवं पूजाआजा गरिने परम्परा बमोजिमनै राष्ट्रपति भण्डारीले पूजाआजा र दर्शन गरेकी हुन्। काभ्रेपलाञ्चोक जिल्लाको साविक साठीघर भगवती गाविसको पलाञ्चोकमा अवस्थित पलाञ्चोक भगवती मन्दिर शक्तिपीठ मध्येको एक हो। काभ्रेपलाञ्चोकको पाँचखालबाट सात किलोमिटर पूर्वतर्फ रहेको लिच्छवीकालीन राजा मानदेवको पालामा बनेको सो मन्दिर धार्मिक पर्यटनको एक गन्तव्य पनि हो। राष्ट्रपति भण्डारी नेपाली सेनाको हेलिकोप्टर मार्फत वीरेन्द्र शान्ति तालिम केन्द्र पाँचखालमा अवतरण गरी बिहान १० बजे मन्दिर परिसर पुगेकी थिइन् । यस मन्दिरमा पूजाआजा गर्न आज दर्शनार्थीको भीड लागेको थियाे।

असाेज १७ साेमबार, काठमाण्डाै । ऐतिहासिक शक्ति पीठ गहवामाई मन्दिरमा महाअष्टमीको अवसरमा बिहानै देखि दिनभर भक्तजनहरूको भीड लागेको थियाे । वीरगञ्जको ऐतिहासिक शक्ति पीठ गहवामाई मन्दिरमा श्रद्धालुहरू भाकल गरि पशुपंक्षीको बलि चढाउने चलन रहँदैआएकाे छ । मन्दिरका मूल पुजारीले आइतबार मध्यरातमा धार्मिक परम्परा र विधि अनुसार पूजा अर्चना गरेर पञ्चबलि दिइसके पछि श्रद्धालुहरूकाे भाकल गरेको पशुपक्षीको बलि दिने कार्य सुरु भएको थियाे । बारा, पर्सा, रौतहट लगायत अन्य जिल्लाहरु र भारतबात समेत हजारौँको सङ्ख्यामा सर्वसाधारणहरू वीरगंजमा मेला भर्न आएका थिए ।

असाेज १४ शुक्रबार, काठमाण्डाै । निजी क्षेत्रहरुलाई विधुत व्यापारको अनुमति दिन सरकारले कानुन मा संसाेधन गर्न अध्यादेश जारी गर्ने तयारी गर्दैछ । विधुत ऐन, २०४९ मा विधुत व्यापारसम्बन्धी प्रावधान छैन । त्यसैले साेहि ऐन, २०४९ लाई संशोधन गर्न बनेको अध्यादेश जारी गर्ने तयारी गरेको छ । विधुत व्यापारसम्बन्धी प्रावधान भएका कारणले गर्दा सरकारले निजी क्षेत्रलाई विधुत व्यापारको अनुमति दिन सकेको थिएन ।अध्यादेश राष्ट्रपति कार्यालयमा पेश गरिसकेको छ । ऊर्जा, जलस्रोत तथा सिँचाइ मन्त्रालयका अनुसार निजी क्षेत्रको मागलाई सम्बोधन गर्दै ऊर्जा व्यापारको मार्ग प्रशस्त गर्ने लक्ष्यका साथ अध्यादेश जारी गर्न लागिएको हो । हाल दैनिक रुपमा दुई हजार दुई सय मेगावाट बिजुली उत्पादन भइरहेको छ । सो बिजुलीमध्ये देशभित्र एक हजार सात सय मेगावाट मात्रै खपत भइरहेको छ । औसतमा तीन सय मेगावाटको हाराहारीमा मात्रै बिजुली निर्यात भइरहँदा पनि बाँकी रहेको दुई सय मेगावाट बिजुली खेर जाने अवस्था रहेकाेछ । देशभित्रका सबै आयोजनाबाट उत्पादित बिजुली उपयोग गर्न नसकिने भएकाले छिमेकी देशमा व्यापारका लागि निजी क्षेत्रलाई सहभागी गराउनै पर्ने बाध्यकारी अवस्थाको सिर्जना भएको ऊर्जा मन्त्रालयको भनाइ छ । जलविधुत विकास नीति, २०५८ मा विधुत व्यापारका लागि अनुमतिपत्र दिने व्यवस्था गरिने भनिए पनि सो बमोजिम हालसम्म कानुनी व्यवस्था हुन सकेको छैन । हाल नेपाल, भारत र बङ्गलादेश सरकारको ऊर्जा सचिवस्तरीय वार्ता भई विधुतआयात निर्यात गर्ने सम्बन्धमा सहमति समेत भइसकेको छ ।