Category: समसमायिक

पुष १९ शनिबार‚ काठमाण्डौ । विसं २०८० मा स्थापना भएको यल नेवा समाजको दोस्रो वार्षिक साधारणसभा (एजिएम) तथा निर्वाचन कार्यक्रम ललितपुर महानगरपालिका पुल्चोक स्थित अक्षेश्वर महाविहारमा भव्य रूपमा सम्पन्न भएको छ।

साधारणसभामा बागमती प्रदेशका संस्कृति तथा पर्यटन मन्त्री सुरेश श्रेष्ठ, पूर्वमन्त्रीहरु प्रेमभक्त महर्जन, रामकृष्ण चित्रकार, र बागमती प्रदेश, ललितपुर क्षेत्र नं. ३ प्रदेशसभा सदस्य रघुनाथ महर्जन तथा विभिन्न सामाजिक संघसंस्थाका प्रतिनिधि तथा यल नेवा समाजका सदस्यहरूको उल्लेखनीय उपस्थिति रहेको थियो। वक्ताहरूले नेवा समुदायको सांस्कृतिक धरोहर संरक्षण आजको आवश्यकता भएको भन्दै समाजले खेलेको भूमिकाको प्रशंसा गरेको थियो।

यल नेवा समाजको मुख्य उद्देश्य नेवा समुदायको मौलिक संस्कृति, भाषा, परम्परा, मठ–मन्दिर, बिहार तथा ऐतिहासिक सम्पदाको संरक्षण र संवर्द्धन गर्नु रहेको छ। साथै, जीर्ण अवस्थामा रहेका धार्मिक तथा सांस्कृतिक संरचनाको मर्मत, पुनर्निर्माण र प्रवर्द्धन गर्दै भावी पुस्तासम्म हस्तान्तरण गर्नु पनि समाजको प्राथमिकतामा रहेको छ।

कार्यक्रममा समाजले आगामी दिनमा सांस्कृतिक कार्यक्रम, सचेतनामूलक अभियान, सम्पदा संरक्षणसम्बन्धी योजना तथा सामाजिक विकासका गतिविधिहरूलाई थप प्रभावकारी रूपमा अगाडि बढाउने निर्णय गरेको जानकारी गराइयो।

कार्यक्रमका क्रममा समाजको नयाँ कार्यसमिति निर्वाचनमार्फत चयन गरिएको थियो । नव–निर्वाचित पदाधिकारी तथा सदस्यहरूले नेवा समुदायको संस्कृति, पहिचान र ऐतिहासिक सम्पदाको संरक्षणमा सक्रिय भूमिका निर्वाह गर्ने प्रतिबद्धता व्यक्त गरेका छन्। निर्वाचनमार्फत अध्यक्षमा  नानी काजी शाक्य, उपाध्यक्षमा  न्हुक्षे बहादुर नेमकुल, सचिवमा संजय शर्मा राजोपाध्याय, सह–सचिवमा विष्णुलाल सिकर्मी तथा कोषाध्यक्षमा दिपेन्द्र राज शिल्पकार, निर्वाचित भएका छन्। यस्तै, सदस्यहरूमा भिम नारायण नकर्मी, दिपेश मान जोशी, प्रकाश देउला र कृष्णदास कर्माचार्य निर्वाचित भएका छन्।

अन्त्यमा, नव–निर्वाचित कार्यसमितिलाई बधाई तथा शुभकामना दिँदै कार्यक्रम समापन गरिएको थियो।

कार्तिक १५ शनिबार, काठमाण्डाै । कात्तिक शुक्ल एकादशीका दिन वैदिक सनातन हिन्दू धर्मावलम्बीहरु भगवान् विष्णुको प्रतीकका रूपमा आज तुलसीको दामोदरसँग विवाह र विशेष पूजा गरिदैछ ।

आसार शुक्ल एकादशी अर्थात् हरि शयनी एकादशीका दिनमा क्षीरसागरमा सुतेका विष्णु ब्युँतिने भएकाले आजको एकादशीलाई हरिबोधिनी वा प्रवोधिनी एकादशी पनि भनिन्छ । हरि शयनी देखि हरि बोधिनी एकादशी का दिनसम्म चार महिना विष्णुका भक्तले तुलसीको व्रत गरी विशेष पूजा गर्दछन् ।

हरिशयनी एकादशीका दिन घरघरमा रोपेर विशेष पूजा गरिएको तुलसीको मठमा गाईको गोबर र रातो माटोले पोतेर सिँगारी फूल मालाले सजाएर विवाह गरिन्छ । तुलसी विष्णुप्रिया भएकाले यस दिन तुलसीको दामोदरसँग विवाह गर्ने परम्परा बसेको हो । तुलसीको मठ नजिकै विष्णुको प्रतीकका रूपमा निगालाको लिङ्ग गाडेर विधिपूर्वक पूजा गरिन्छ ।

हरिशयनी एकादशीदेखि पूजा गरिएको तुलसीको उद्यापन अग्निस्थापना विधिबाट विशेष पूजा र हवनसहित गरिन्छ । किसानले उखुको बोट मठमा गाड्छन् । यस दिन अन्न खान नहुने भएकाले सखरखन्ड, पिँडालु र वनतरुल उसिनेर फलाहार गरिन्छ । यसरी व्रत गरेमा पापको नाश भई पुण्य वृद्धि हुने र मोक्ष प्राप्ति हुन्छ भन्ने धार्मिक विश्वास छ । ठूलो एकादशी पनि भनिने आजको एकादशी व्रतले हजार अश्वमेध यज्ञ तथा राजसूय यज्ञ गरे बराबरको फल पाइने शास्त्रीय मान्यता छ ।

आजका दिन देशका विभिन्न नारायण मन्दिरमा विशेष पूजा गरी यो पर्व मनाइदैछ । यस दिन धादिङको नीलकण्ठ नगरपालिका वडा ४ स्थित ऐतिहासिक कालिका मन्दिरमा विशेष मेला लाग्ने गर्दछ । त्यसैगरी काठमाण्डौ उपत्यकाका चार नारायण, भक्तपुरको चाँगुनारायण, ललितपुरको विशङ्खुनारायण, काठमाण्डौ का शेष नारायण र इचँगुनारायण स्थानमा विशेष मेला लाग्दछ । यसैगरी बूढानीलकण्ठ नारायणस्थानमा पनि आज दर्शनार्थीहरुकाे ठुलाे भिड लाग्दछ ।

आश्विन ४ शनिबार, काठमाण्डाै । देशका विभिन्नमा स्थानमा केही दिन देखी परेको वर्षासँगै आएको बाढी र पहिरोले राजमार्गहरु अवरुद्ध भएका छन् । नेपाल प्रहरीका केन्द्रीय प्रवक्ता तथा प्रहरी नायब महानिरीक्षक विनोद घिमिरेका अनुसार हाल ती अवरुद्ध भएका क्षेत्रहरुमा पहिरो पन्छाउने काम जारी रहेको छ ।

उहाँका अनुसार कोशी राजमार्गको भोटखोलामा सडक पूर्ण रुपमा अवरुद्ध छ । साथै कोशी राजमार्गकै मकालु गाउँपालिकाको एकुवामा पनि सडक अवरुद्ध छ ।

त्यसतै सिद्धिचरण लोकमार्गको कटारी नगरपालिका–८ सिरिसेमा पहिरोले सडक अवरुद्ध भएकाेछ । बाढीका कारण रसुवासँग चीन जोड्ने मितेरी पुलमा पनि सडक अवरुद्ध बनाएको छ ।

वादी पहिराे ले अरनिको राजमार्ग अन्तर्गत सिन्धुपाल्चोकको भोटेकोशी गाउँपालिकाको कोदारी र डाक्लाङ दुवै स्थानमा बाटाे अवरुद्ध बनाएकाे बताउनुभयाे ।

साथै प्रहरीले जनाएअनुसार चितवनको इच्छाकामना गाउँपालिका–५ तुइन खोलामा पहिरो खसेर नारायणगढ मुग्लिन सडक अवरुद्ध छ । यहाँ शुक्रबार बेलुकादेखि पहिरो खस्न थालेको र आज बिहान सम्म पनि खसिरहेकाले पन्छाउन समस्या भएको छ ।

तर कालीगण्डकी करिडोर रत्न राजमार्ग, पूर्वपश्चिम राजमार्ग गल्छी ,त्रिशूली सडक लगायतमा भने एकतर्फी रुपमा भएपनि खुलाइएकाे छ।

श्रावण १२ साेमबार, काठमाण्डाै । सर्वाेच्चकाे मुख्य रजिस्ट्रारमा विमल पौडेल नियुक्त हुनु भएकाे छ। न्याय परिसदका प्रवक्ता डा.अशोककुमार क्षेत्रीले जानकारी दिए अनुसार न्याय सेवा आयोगको आज बसेको बैठकले पौडेललाई मुख्य रजिष्ट्रारमा नियुक्त गर्ने निर्णय गरेको हाे ।

उनका अनुसार मुख्य रजिष्ट्रार देवेन्द्रराज ढकाल ५८ वर्षे उमेर हदका कारण आइतबार देखि अनिवार्य अवकाशमा लिएका थिए। बैठकले सर्वोच्च अदालतको रजिष्ट्रारमा सह रजिष्ट्रार मानवहादुर कार्कीलाई नियुक्त गर्ने निर्णय गरेको छ।

श्रावण १ बिहिबार,मुस्ताङ । मुस्ताङको घरपझोङ–४ जोमसोमदेखि बारागुङ मुक्तिक्षेत्र–५ धार्काजुङसम्म साइकल ट्रेल निर्माण गरिएको छ । पर्यटन तथा उद्योग कार्यालय मुस्ताङका अनुसार जोमसोम-धार्काजुङसम्मको करिब आठ किलोमिटर लम्बाइको साइकल ट्रेल रु २० लाख बजेटमा निर्माण गरिएको हो ।

पर्यटन तथा उद्योग कार्यालयका प्रमुख प्रेम पौडेलले यस साइकल ट्रेलकाे निर्माणले मुस्ताङको पर्यटन विकास, पर्यटन प्रवर्द्धनका साथै पर्यटकको बसाइँ लम्ब्याउनका मद्दत गर्ने बताउनुभयाे ।

ट्रेल निर्माणका लागि सुक्खावाल, ग्याविन वालका साथै जोमसोम–धार्काजुङ ट्रेलमा दुई वटा फलामे पुल बनाइएको छ । ट्रेल निर्माणमा साबिकको पुरानो बाटोको स्तरोन्नति र नयाँ दुई किमी सडकमा ट्रयाक ओपन गरिएको छ ।

पौडेलका अनुसार समुन्द्री सतहको करिब चार हजारभन्दा माथिको उचाइमा रहेको ढल्केडाँडा छिचोल्दै साइकल ट्रेल गर्ने पर्यटकले यहाँको प्राकृतिक सौन्दर्यता र पर्वतीय उच्च उचाइमा बेग्लै अनुभव गर्न सक्नेछन् । साथै ढल्केडाँडा पुग्ने पर्यटकले उपल्लो मुस्ताङ, नेपाल–चीन सिमाना, तल्लो मुस्ताङ र मध्य मुस्ताङको विभिन्न क्षेत्रको दृश्यावलोकन गर्न सक्नेछन् ।

अब पर्वतीय हाइअल्टिच्युड साइकल ट्रेल निर्माणसँगै यहाँ साइक्लिङ गर्न आउने पर्यटकले जोमसोम–कागबेनी सडकमार्ग प्रयोग नगरी धार्काजुङ हुँदै मुस्ताङ–डोल्पासम्मको छोटो यात्रा गर्न पनि सक्नेछन् ।

चैत १० आइतबार,काठमाण्डाै। दक्षिण एसियाली क्षेत्रका कृषकहरु बैङ्कको कर्जा तिर्न नसक्दा धरापमा परेका छन्। दक्षिण एसियाली किसान महासङ्घले काठमाण्डाैमा आयोजना गरेको पत्रकार सम्मेलनमा घोषणापत्र सार्वजनिक गर्दै किसानले उत्पादनको मूल्य नपाउँदा बैङ्कबाट लिएको कर्जा समेत तिर्न नसकेकाे र पेसाबाटै पलायन हुने अवस्था रहेकाे जनकारी दिएकाे छ ।

महासङ्घका अध्यक्ष डा प्रेम दङ्गालले सम्मेलनमा दक्षिण एसियाली क्षेत्रका किसानले उत्पादनको मूल्य नपाउने साझा समस्या भोगिरहेका र यसको समाधान हुनुपर्नेमा जोड दिइएको बताउनु भयाे । साथै हालको कृषि प्रणालीले माटोको स्वास्थ्य र जलवायु परिवर्तनमा असर गरेकाले यसलाई फेर्नुपर्ने जोड दिइएको पनि बताउनुभयो ।

उहाँका अनुसार सम्मेलनमा रासायनिकबाट प्राङ्गारिक खेतीमा जानुपर्ने, किसानको शिक्षा, स्वास्थ्यलगायत सामाजिक सुरक्षा सुनिश्चित गरिनुपर्नेमा आठै देशका किसान प्रतिनिधिले जोड दिएकाे बताउनुभयाे । साथै दक्षिण एसियाली देशका किसानले सिधै उपभोक्तालाई बेचबिखन गर्न सक्ने गरी कानुनी व्यवस्था गरिनुपर्नेमा पनि सम्मेलनले जोड दिएको जानकारी दिनुभयाे ।

सम्मेलन चैत ७ र ८ गते काठमाण्डौमा सम्पन्न भएको थियो । प्रधानमन्त्री केपी शर्मा ओलीले सम्मेलनको उद्घाटन गर्नुभएको थियो ।सम्मेलनले २४ बुँदे घोषणापत्र र चार बुँदे प्रतिबद्धता पत्र सार्वजनिक गरेको छ ।

चैत ३ आइतबार,काठमाण्डाै। स्वास्थ्य तथा जनसङ्ख्या मन्त्रालय र नेपाल आँखा कार्यक्रम तिलगंगा बिच सहयोग आदानप्रदान सम्बन्धी सम्झौता भएको छ ।

स्वास्थ्य तथा जनसङ्ख्या मन्त्री प्रदीप पौडेल र तिलगंगाका कार्यकारी निर्देशक वरिष्ठ नेत्ररोग विशेषज्ञ डा. सन्दुक रुइतको उपस्थितिमा सम्झौता भएको हो । यसले आँखा स्वास्थ्य सेवामा नेपाली नागरिकको पहुँच बढाउन सहयाेग मिल्ने विश्वास लिएकाे छ ।

यस सम्झौतामा मन्त्रालयले तिलगंगाको सेवा तथा क्षमता वृद्धिका लागि सघाउनेछ । साथै तिलगंगाले उत्पादित लेन्स दुर्गमका नागरिकलाई १० प्रतिशत तथा अन्य नागरिकका लागि अधिक छुटमा उपलब्ध गराउने छ । यसैगरी तिलगंगाले आँखा स्वास्थ्य सेवामा पहुँच वृद्धि गर्दै अन्धोपन निवारणका लागि वर्गीकृत दक्ष जनशक्ति उत्पादन गरी ग्रामीण तहसम्म आँखा स्वास्थ्य सेवा पुर्‍याउनेछ ।

फाल्गुण २९ बिहिबार, काठमाण्डाै । प्रतिकूल मौसमका कारण एक सातादेखि मुलुकको उडान प्रभावित भइरहेको छ । त्रिभुवन अन्तर्राष्ट्रिय विमानस्थलका प्रवक्ता रिञ्जी शेर्पाका अनुसार प्रतिकुल मौसमका कारण आवश्यक भिजिबिलिटी नहुँदा र आन्तरिक र अन्तर्राष्ट्रिय हवाई उडान प्रभावित भएकाे छ ।

उनका अनुसार प्रतिकूल मौसमका कारण अन्तर्राष्ट्रिय हवाई उडान अझ बढी प्रभावित भइरहेको छ । किनकि नेपालमा अहिले प्रि–मनसुनी गतिविधि सक्रिय भइरहेको र वर्षा गराउने मौसमी प्रणालीको विकास भइरहेकाले मौसम प्रतिकूल हुँदा न्यून भिजिबिलिटी तथा हावाको गति नमिलेका कारण अन्तर्राष्ट्रिय उडानका जहाज होल्ड र मिस एप्रोच हुने गरेको बताउनुभयो ।

त्यसतै उहाँले अन्तर्राष्ट्रिय उडानका जहाज काठमाण्डौ विमानस्थलको धावनमार्गको पश्चिमतर्फ ‘जिरो टु’बाट मात्रै अवतरण गर्नुपर्ने हुन्छ भने आन्तरिक उडानका जहाजलाई लामो रनवे भएकाले दुवैतर्फबाट अवतरण गर्न मिल्ने भएकाले त्यतिधेरै समस्या नरहेको जानकारी दिनुभयाे ।

फाल्गुण २९ बिहिबार, काठमाण्डाै । राष्ट्रपति रामचन्द्र पौडेलले फागुपूर्णिमा (होली) पर्वले समाजमा रहेका विकृति, विसङ्गति एवम् कुरीतिलाई निर्मूल गर्दै मौलिक संस्कृतिको संरक्षण र संवर्द्धन गर्न प्रेरणा मिलाेस भनी शुभकामना व्यक्त गर्नुभयो ।

होली पर्वका अवसरमा शुभकामना सन्देश दिँदै उहाँले सामाजिक सद्भाव र राष्ट्रिय एकतालाई थप सुदृढ बनाउन पर्वले योगदान पुर्‍याउने विश्वास रहेकाे बताउनुभयाे ।

उहाँले यस पर्वले समस्त नेपालीहरूबीच रिस, राग परित्याग गरी प्रेम र आत्मीयताद्वारा सामाजिक सद्भाव र राष्ट्रिय एकतालाई थप सुदृढ बनाउन योगदान पुर्याउने विश्वास लिएको छु बताउनुभयाे ।

होली पर्व असत्यमाथि सत्यको, अन्यायमाथि न्यायको, दूराचारमाथि सदाचारको र अधर्ममाथि धर्मको विजय भएको खुसियालीमा मनाइने गरिन्छ । काठमाण्डाैकाे वसन्तपुर मा रङ्गीचङ्गी कपडाले सजिएको चीर ठड्याएपछि प्रारम्भ हुने होली पर्व पूर्णिमाको राति चीर दाह गरेपछि समापन हुन्छ ।

फाल्गुण २८ बुधबार, काठमाण्डाै । देशका विभिन्न क्षेत्रमा गड्याङ्गुडुङ सहित वर्षा भइरहेको छ ।

जल तथा मौसम विज्ञान विभाग, मौसम पूर्वानुमान महाशाखाले जनाएअनुसार गण्डकी प्रदेश, बागमती प्रदेश र कोशी प्रदेशको पहाडी भूभागमा मौसमी प्रणाली विकसित भई पूर्वतिर सर्ने क्रममा रहेको र पहाडी क्षेत्रहरूमा वर्षा भइरहेको छ ।

मौसमविद् गोविन्द झा का अनुसार काठमाण्डाैमा पनि गड्याङ्गुडुङसहित अहिले वर्षा भइरहेको छ । पहाडी भूभागका एक–दुई स्थानमा मेघ गर्जन र चट्याङ्ग सहित वर्षा भइरहेको जसले गर्दा दैनिकी सकेर घर फर्कन लागेका नागरिकहरू प्रभावित भएका छन् ।

आज राति कोशी प्रदेश, बागमती प्रदेश, गण्डकी प्रदेश र कर्णाली प्रदेशका उच्च पहाडी तथा हिमाली भू–भागका एक–दुई स्थानमा हल्का हिमपातको सम्भावना रहेको महाशाखाले जनाएको छ । साथै आवश्यक सतर्कता अपनाउन महाशाखाले अनुरोध पनि गरेको छ । वर्षा भएपछि उपत्यकामा चिसो महसुस गरिएको छ ।

फाल्गुण १८ आईतबार, काठमाण्डाै । स्वास्थ्य तथा जनसङ्ख्यामन्त्री प्रदीप पौडेलले अब सरकारी अस्पतालले स्वास्थ्य बिमाको औषधि छैन भन्न नपाइने बताउनुभयाे । इलाम अस्पतालको अनुगमन गर्दै उहाँले स्वास्थ्य बिमा बोर्डले तोकिएका औषधि अनिवार्य रुपमा हुनुपर्ने बताउनुभएको हो ।

उहाँले अब चिकित्सकले लेखेका औषधि छैन भनेर पन्छिने छुट सरकारी अस्पताललाई नभएको बताउनुभयाे । साथै सरकार तथा स्वास्थ्य बिमा बोर्डले ताेकिएका ९८ प्रकारका औषधि अस्पतालमा अनिवार्य राख्न पनि आग्रह गर्नुभयो । उहाँले बिमा व्यवस्थापनमा केही समस्या भए पनि यसलाई सुधार गर्दै लैजान लागेको बताउँनुभयाे।

स्वास्थ्यमन्त्री पौडेलले चिकित्सकहरु सुगममा बस्न रुचाउने हुँदा दुर्गम जिल्लामा दरबन्दीअनुसारकाे नरहेकाे पाइएकाे छ। अब सरकारले जसलाई जहाँ खटाएको छ सोही ठाउँमा जानुपर्ने अनिवार्य व्यवस्था गरिने पनि बताउनुभयो ।

उहाँले अस्पताल तथा स्वास्थ्य चौकीहरूले पूर्वाधार र औजारका विषयमा आवश्यक्ता अनुसार मात्र मन्त्रालयमा माग गर्नुपर्ने बताउनुभयो । आवश्यकताअनुसार माग भए सम्बोधन गर्न सकिने उहाँको भनाइ छ । स्वास्थ्य चौकीमा एमआरआई र सिटी माग्दा हाल सम्बोधन गर्न नसकिने पनि बताउनुभयाे।

फाल्गुण १८ आईतबार, काठमाण्डाै । गृहमन्त्री रमेश लेखकले सरकार पाथीभरा केबलकार निर्माणमा आन्दोलनरत पक्षको मागलाई संवादका माध्यमबाट सम्बोधन गर्न प्रतिबद्ध रहेको बताउनुभयाे ।

साथै राष्ट्रियसभाको बैठकमा सांसदहरुले उठाएका प्रश्नको जवाफ दिँदै गृहमन्त्री लेखकले पाथीभरा केबलकार निर्माणका आन्दोलनरत पक्षलाई शान्तिपूर्ण वार्तामा आउन पनि अपिल गर्नुभयो ।

फाल्गुण ११ आईतबार, काठमाण्डाै । काठमाण्डाै-तराई मधेस द्रुतमार्गको भौतिक प्रगति ३८.२६ र वित्तीय प्रगति ३९.८४ प्रतिशत पुगेकोछ ।

नेपाली सेनाको २६२औँ स्थापना दिवसका अवसरमा आयोजित पत्रकार सम्मेलनमा कुल ७०.९७७ किमी दूरीको उक्त आयोजना अन्तर्गत रहेका सात सुरुङमध्ये दुईवटा ‘ब्रेक थ्रू’ भइसकेका र दुईवटा निर्माणाधीन रहेकाे आयोजना प्रमुख कमलविक्रम शाहले जानकारी दिनुभयाे।

उहाँका अनुसार अन्य तीनवटा सुरुङको डिजाइन तथा पूर्व तयारीका कार्य भइरहेको विभिन्न कारणले उक्त आयोजनाको भौतिक प्रगति अपेक्षा अनुसार नभए पनि लक्ष्यअनुसार कार्य सम्पन्न गर्न कोसिस भइरहेको पनि बताउनुभयो ।

साथै आयोजनाको प्रस्थान विन्दु खोकनामा जग्गा प्राप्तिसम्बन्धी विवाद पनि टुङ्गि नसकेको बताउनुभयाे । उनले राजधानीबाट तराई जोड्ने छोटो दूरीको उक्त आयोजना सम्पन्न भएपछि मुलुकको समग्र आर्थिक विकासमा कायापलट हुने पनि बताउनु भयो।

प्रमुख शाहका अनुसार नेपाली सेनाको व्यवस्थापनमा अघि बढाइएको राष्ट्रिय गौरवका आयोजनामध्ये याे पनि एक सर्वाधिक महत्व बोकेको आयाेजना हाे। त्यसैले नेपाली सेनाले आगामी २०८३ चैत मसान्तसम्ममा यसलाई सम्पन्न गर्ने लक्ष्य लिएको पनि बताउनुभयो ।

माघ २० आइतबार काठमाण्डाै। हरेक वर्ष झै माघ शुक्ल पञ्चमीका दिन ‘श्रीपञ्चमी’काे अवसरमा विद्याकी अधिष्ठात्री देवी सरस्वतीको पूजा आराधना गरेर मनाइयाे । आजका दिन विद्या, ज्ञान प्राप्तिको कामना गर्दै विधिपूर्वक देवीको पूजा, आराधना गरिने गर्छ।

विद्या र सिर्जनाकी देवी भएकाले विशेष गरी साहित्यकार, कलाकार, पत्रकार, शिक्षक र विद्यार्थी आ–आफ्ना कला–साधनाका वस्तु कलम, कापी, कुची र वाद्ययन्त्र आदिलाई सरस्वतीका रूपमा पूजा–आराधना गर्छन् । साथै सरस्वतीलाई तान्त्रिकहरूले तन्त्र सिद्धिका लागि तारादेवीका रूपमा मान्छन् ।

यस दिन निष्ठापूर्वक सरस्वतीको पूजा–आराधना गरेमा विद्या प्राप्त हुने शास्त्रीय मान्यता छ । त्यसैले बिहानैदेखि लाजिम्पाटस्थित नील सरस्वतीस्थान, स्वयम्भूस्थित सरस्वती मन्दिर, ललितपुर लेलेस्थित सरस्वती कुण्डलगायत राजधानीका विभिन्न स्थानमा रहेका सरस्वती मन्दिरमा भक्तजनको भीड लागेको थियो ।

माघ १८ शुक्रबार काठमाण्डाै। सरकारले भक्तपुरमा बाल अदालत गठन गर्ने निर्णय गरेको छ । मन्त्रिपरिषदमा बसेकाे बैठकले निर्णय गरे अनुसार आगामी वर्षको वैशाख २ गतेदेखि बाल अदालत सञ्चालनमा ल्याइने भएकाेछ ।

सञ्चार तथा सूचना प्रविधिमन्त्री पृथ्वीसुब्बा गुरुङले मन्त्रिपरिषद्को माघ १५ गतेकाे निर्णय सार्वजनिक गर्दै बालबालिकासम्बन्धी ऐन बमोजिम काठमाण्डौ, ललितपुर, भक्तपुर र काभ्रेपलाञ्चोक जिल्ला अदालतको बाल इजलासबाट हेरिने मुद्दाहरुको समेत प्रादेशिक क्षेत्राधिकार रहनेगरी भक्तपुरमा बाल अदालत गठन गर्ने निर्णय गरेकाे बताउनुभयाे।

माघ १६ बुधबार काठमाण्डाै। गृहमन्त्री रमेश लेखकले सहिदहरूले देखाएको बाटोमा अघि बढ्नु राष्ट्रिय दायित्व रहेकाे बताउनु भयाे । राष्ट्रिय सहिद दिवसका अवसरमा सङ्घीय सरकारद्वारा सिंहदरबार परिसरमा आयोजित समारोहमा उहाँले देशमा दिगो शान्ति, सुशासन, समृद्धि, स्थायित्व र विकासको मार्गलाई सुदृढ गर्दै सहिदका सपनाहरु पुरा गर्नुपर्ने बताउनुभयो ।

गृहमन्त्री लेखकले संविधानको रक्षा, सङ्घीय लोकतान्त्रिक शासन व्यवस्थाको सुदृढीकरण आजको राष्ट्रिय आवश्यकता हो भन्दै सबैले सहमति, समन्वय र सहकार्यका माध्यमबाट यसको रक्षा गर्दै सङ्घीय लोकतान्त्रिक गणतन्त्रात्मक शासन व्यवस्थालाई सुदृढ गर्दै जानुपर्ने बताउनुभयो ।

उहाँले वर्तमान सरकार नागरिकको पक्षमा रहेको भन्दै कानुनी शासन स्थापना सरकारको पहिलो प्राथमिकता रहेको उल्लेख गर्नुभयो । साथै राष्ट्रिय एकता, समुन्नति तथा समाजमा सद्भाव कायम राख्न सबै राजनीतिक दलबीच समन्वय र सहकार्य आवश्यक रहेकाे बताउनुभयाे । उँहाले लोकतन्त्रको रक्षा गर्दै सहिदहरूको बलिदानलाई सार्थक तुल्याउने कार्यमा सहकार्य गर्न सबैमा आह्वान पनि गर्नुभयो ।

भाद्र १७ साेमबार, काठमाण्डाै। देशभरि डेङ्गीका बिरामीको सङ्ख्या छ हजार तीन सय ४७ पुगेको छ । इपिडिमियोलोजी तथा सरुवा रोग नियन्त्रण महाशाखाका किटजन्य रोग शाखाका प्रमुख डा गोकर्णप्रसाद दाहालका अनुसार छ हजार तीन सय ४७ जनामा डेङ्गी रोगको सङ्क्रमण देखिनुका साथै तीन जना डेङ्गी रोगको सङ्क्रमणको कारणले निधन भइसकेको छ ।

महाशाखाका अनुसार डेङ्गी रोगको सङ्क्रमण हुम्ला र मुस्ताङ बाहेक सबै जिल्लामा देखिएको छ । पानी जम्ने सफा ठाउँमा ‘एडिज एजिप्टी र एडिस एल्बोपिक्टस’ प्रजातिको लामखुट्टेले फुल पार्दछ र ती फुल लार्भा निस्कन्छ र त्यही लार्भा वयस्क भएपछि मानिसलाई टोक्यो भने डेङ्गी रोग लाग्दछ ।

महाशाखाका अनुसार डेङ्गी सबभन्दा बढी गण्डकी प्रदेशमा दुई हजार नौ सय ५४ जनामा देखिएको छ । कोशी प्रदेशमा सात सय ९१ जना, मधेसमा सय जना, बागमतीमा एक हजार छ सय २३ जना, लुम्बिनी चार सय ४४ जना, कर्णालीमा ९३ जना र सुदूरपश्चिम प्रदेशमा तीन सय ४२ जना सङ्क्रमण देखिएको छ।

वर्षाका बेला पानीका सङ्कलन गरेर राख्ने र सङ्कलन गरिएको पानीमा लामखुट्टे रहने र त्यही लामखुट्टेले टोक्ने भएकाले डेङ्गीको सङ्क्रमण बढेको हो ।

स्वास्थ्य तथा जनसङ्ख्या मन्त्रालयले डेङ्गी रोगको सङ्क्रमण बढेपछि हरेक शुक्रबार सरकारी तथा गैरसरकारी कार्यालयमा र अस्पताल परिसरमा सरसफाइ गर्नुको साथै ‘लामखुट्टे खोज र नष्ट गर’ अभियान सञ्चालन गर्न आग्रह गरेको छ । सरकारी अस्पतालमा डेङ्गी रोगका बिरामीका उपचार खर्च सरकारले व्यहोर्ने निर्णय गरेको छ ।

भाद्र १६ आइतबार, काठमाण्डाै। प्रधानमन्त्री केपी शर्मा ओलीले नेपाल बाल सङ्गठन (बालमन्दिर)का देशभर रहेका भौतिक सम्पत्तिको पूर्ण संरक्षण र उपयोग गराउन निर्देशन दिनुभएको छ । प्रधानमन्त्री तथा मन्त्रिपरिषद्को कार्यालय, सिंहदरबारमा बालमन्दिरका पदाधिकारी सँग आज भएको छलफलमा उहाँले सङ्गठनकाे जमिन, भवन र सम्पत्तिको पूर्ण सुरक्षाका लागि आवश्यक परे कठोर कदम चाल्न निर्देशन दिनुभएको हो ।

प्रधानमन्त्री ओलीले बाल मन्दिरका जग्गा कसैले अतिक्रमण गरेको वा नियम बमोजिम भाडा सम्झौता नगरी बसेको छ भने कडाइ र तीव्रताका साथ तिनको नियन्त्रण र प्रयोग हुनुपर्ने र धनी पुर्जाबिना लामो समयदेखि सङ्गठनले भोगाधिकार लिँदै आएको जग्गा सङ्गठनकै नाममा ल्याइनुपर्ने बताउनुभयाे ।

प्रधानमन्त्री ओलीले सङ्गठनको नयाँ विधान स्वीकृतिका लागि मन्त्रिपरिषद्मा प्रस्ताव ल्याउन, सङ्गठनको जिम्मामा रहेका बालबालिकालाई सन्तुलित आहार, उचित लत्ताकपडा र माया ममता दिन र गुणस्तरीय शिक्षा उपलब्धताको सुनिश्चितताका लागि आग्रह गर्नुभयो ।

उक्त छलफलमा नवनियुक्त मुख्यसचिव एकनारायण अर्याल, कानुन, न्याय तथा संसदीय मामिला मन्त्रालयका सचिव फणिन्द्र गौतम लगायतका व्यक्तिहरुकाे उपस्थिति रहेेकाे थियाे ।

भाद्र १५ शनिबार, काठमाण्डाै। नुवाकोटमा निर्माणाधीन केन्द्रीय कारागार सञ्चालनमा आएको छ । गृहमन्त्री रमेश लेखकले कारागारको पहिलो युनिट भवनको नवनिर्मित संरचनाको उद्घाटन गर्नुभएकाे हाे ।

गृहमन्त्री लेखकले विदुर नगरपालिका–६ स्थित खम्पाक्याम्पमा निर्माण गरिएको केन्द्रीय कारागारको भवनलाई औद्योगिक कारागारको रुपमा स्थापित गराउन आवश्यक थप संरचनालाई क्रमशः निर्माण गर्दै अघि बढाइने जानकारी दिनुभयो ।

कारागार भवन उद्घाटनको कार्यक्रममा कानून न्याय तथा मानव अधिकार समितिका सभापति बिलमा सुवेदी, राज्य व्यवस्था तथा सुशासन समितिका सभापति रामहरि खतिवडा, महान्यायधिवक्ता रमेश बडाल, प्रतिनिधिसभा सदस्य हितबहादुर तामाङ र सिता मिजार, निमित्त गृहसचिव नारायणप्रसाद भट्टराई लगायतका व्यक्तिहरु उपस्थित थिए ।

भाद्र १३ बिहिबार, काठमाण्डाै। राष्ट्रपति रामचन्द्र पौडेलले सत्य निरूपण तथा मेलमिलाप आयोग र बेपत्ता नागरिक छानबिन आयोग सम्बन्धी (टिआरसी) विधेयक प्रमाणीकरण गर्नुभएको छ । राष्ट्रपति पौडेलले नेपालको संविधानको धारा ११३ को उपधारा (२) बमोजिम उक्त विधेयक प्रमाणीकरण गर्नुभएको हो ।

सो विधेयक सङ्घीय संसद्काे दुवै सदनको बैठकबाट पारित भई प्रमाणीकरणका लागि राष्ट्रपति समक्ष पेस भएको थियाे।

भाद्र ८ शनिबार, काठमाण्डाै। तनहुँको आँबुखैरेनीमा भएको बस दुर्घटनामा मृत्यु भएका २७ जनाको शव भारत पठाइएको छ।

चितवनका प्रमुख जिल्ला अधिकारी इन्द्रदेव यादवका अनुसार शनिबार भारतबाट भरतपुर आएकाे भारतीय सेनाकाे विमानमा २५ जनाकाे शव र सडकमार्गबाट दुई जनाको शव गोरखपुर पठाइएको बताउनुभयाे । दुर्घटनामा मृत्यु भएका २७ जनाको शव भरतपुर अस्पतालमा पोष्टमार्टम गरेकाे थियाे ।

दुर्घटनामा घाइते भएका १६ जनालाई शुक्रबार नै हेलिकप्टर मार्फत काठमाण्डौ ल्याइएको थियो । उनीहरुको त्रिभुवन शिक्षण अस्पतालमा उपचार भइरहेको छ । प्रहरीले जनाएको अनुसार मृतक र घाइते सबै भारतको महाराष्ट्र प्रदेश जलगाउँ जिल्लाका हुन् ।

भाद्र ८ शनिबार, काठमाण्डाै। देशभर मनसुनी वायुको प्रभाव कायमै रहेकाेछ । जल तथा मौसम विज्ञान विभाग, मौसम पूर्वानुमान महाशाखाका अनुसार मनसुनको न्यून चापीय रेखा पश्चिमतिर सरदर स्थानमा र पूर्वतिर सरदर स्थानको केही उत्तरतर्फ अवस्थित छ ।

विभागका अनुसार बागमती प्रदेशका केही स्थान, मधेस प्रदेशका थोरै स्थान तथा बाँकी प्रदेशका एक–दुई स्थानमा मेघ गर्जन/चट्याङ्ग सहित हल्का देखि मध्यम वर्षा हल्का वर्षा भइरहेको छ । देशभर आज दिउँसो आंशिकदेखि साधारणतया बदली रहने विभागको अनुमान छ । बागमती,  गण्डकी,  लुम्बिनी र सुदूरपश्चिम प्रदेशका एक–दुई स्थानमा भारी वर्षाको सम्भावना छ ।

देशभर आज राति आंशिकदेखि साधारणतया बदली रहने छ । कोशी, बागमती, गण्डकी र सुदूरपश्चिम प्रदेशका केही स्थान तथा बाँकी प्रदेशका थोरै स्थानमा मेघ गर्जन/चट्याङ्गसहित हल्कादेखि मध्यम वर्षाको सम्भावना रहेको विभागले जनाएको छ ।

आगामी २४ घण्टामा सबै प्रदेशका केही स्थानमा मेघ गर्जन/ चट्याङ्गसहित हल्कादेखि मध्यम वर्षाको सम्भावना छ । विभागले केही स्थानमा भारी वर्षाको पनि सम्भावना रहेकोले ती क्षेत्रमा हुन सक्ने गेग्रान बहाव, बाढी, पहिरो तथा भू–क्षय जस्ता प्रकोपको जोखिम वा क्षतिबाट बच्न तथा यसबाट ती क्षेत्रहरूमा दैनिक जनजीवन लगायत कृषि, स्वास्थ्य, पर्यटन, पर्वतारोहण, सडक तथा हवाई यातायातमा आंशिक असर पर्ने सम्भावना रहेकोले आवश्यक सतर्कता अपनाउनु हुन अनुरोध गरेको छ ।

भाद्र ६ बिहिबार, काठमाण्डाै। नेपाल सरकारले सामाजिक सञ्जाल ‘टिकटक’ मा रहेकाे प्रतिबन्ध हताइने निर्णय गरेकाे छ । मन्त्रिपरिषदको आज बसेको बैठकले टिकटकमा रहेकाे प्रतिबन्ध हताइने निर्णय गरेको सञ्चार तथा सूचना प्रविधिमन्त्री एवं सरकारका प्रवक्ता पृथ्वीसुब्बा गुरुङले जानकारी दिनुभयो ।

साउन २४ गते सञ्चारमन्त्री, सचिव र नेपाल दूरसञ्चार प्राधिकरणका अधिकारीको छलफलमा प्रधानमन्त्री केपी शर्मा ओलीले दिनुभएको निर्देशनका आधारमा सञ्चार मन्त्रालयले उक्त प्रस्ताव तयार गरेको थियो ।

टिकटकको प्रयोग गरेर विकृति बढेको भनी टिप्पणी भएपछि तत्कालीन सरकारले गत कात्तिक २७ गते टिकटिकमाथि प्रतिबन्ध लगाएको थियो ।

टिकटकको प्यारेन्ट कम्पनी बाइटडान्सले नेपालको कानुनबमोजिम चल्न तयार रहेको भन्दै पत्र बुझाएसँगै सरकारले प्रतिबन्ध हटाएको हो ।

भाद्र ३ साेमबार, काठमाण्डाै। भाद्र कृष्ण प्रतिपदाका दिनदेखि आठ दिन अर्थात् अष्टमीसम्म मनाइने गाईजात्रा पर्व उपत्यका लगायत देशभरका मुख्य सहरमा दिवङ्गत आफन्तको सम्झनामा विभिन्न कार्यक्रम गरी मनाइएको छ ।

भाद्र कृष्ण प्रतिपदादेखि अष्टमीसम्म मनाइने यो पर्व मल्लकालदेखि शुरु भएको हो । एक वर्षयता दिवङ्गत भएका आफन्तको सम्झनामा आज गाई वा मानिसलाई गाईका रूपमा सिँगारी परिक्रमा गराएर दूध, फलफूल, रोटी, चिउरा, दहीका साथै अन्न र द्रव्य दान गरी मनाइएको छ । मृत्यु भएकाको सम्झनामा नगरपरिक्रमा गर्नाले गाईको पुच्छर समाई वैतरणी पार हुन्छन् भन्ने धार्मिक विश्वास रहेकाेछ । 

राजा प्रताप मल्लले पुत्रशोकले विह्वल भएकी आफ्नी रानीलाई दुनियाँले पनि यस्तै शोक बेहोर्नुपर्छ भन्ने देखाउन ‘जनतालाई आ–आफ्नो मरेका व्यक्तिका नाममा गाईजात्रा निकाली सहर परिक्रमा गराउनू’ भनी आज्ञा दिएको ऐतिहासिक तथ्य छ । त्यति गर्दा पनि रानीको मन शान्त हुन नसकेपछि विभिन्न प्रकारका प्रहसन तथा व्यङ्ग्यात्मक कार्यक्रम गराउने आदेश दिए अनुरूप जात्राको प्रचलन चलेको हो भन्ने जन श्रुति पाइन्छ ।

यसै बेलादेखि प्रचलनमा आएको गाईजात्रा हनुमानढोकास्थित राजप्रासाद भएर जानुपर्ने प्रथा अहिले पनि कायमै छ । देशका विभिन्न सहरमा गाईजात्रा मनाइने भएपनि उपत्यकामा यसको विशेष रौनकता हुन्छ । गाईजात्राका अवसरमा काठमाण्डौ उपत्यकामा सार्वजनिक बिदा दिइएकाे छ ।

भाद्र कृष्ण अष्टमीका दिनसम्म मनाइने यस पर्वका क्रममा प्रहसन, सामाजिक विकृतिप्रति व्यङ्ग्यात्मक प्रदर्शन, नाचगान तथा मृत व्यक्तिको सम्झनामा रामायणको करुण रसका गीतहरू पनि गाइन्छन् ।

यो पर्व काठमाण्डौ उपत्यकालगायत बनेपा, धुलिखेल, पनौती, बाह्रबिसे, त्रिशूली, दोलखा, खोटाङ, भोजपुर, चैनपुर, इलाम, धरान, विराटनगर, वीरगञ्ज, हेटौँडा र पोखरा लगायतका शहरमा पनि विभिन्न कार्यक्रम गरि मनाइयाे ।

भाद्र ३ साेमबार, काठमाण्डाै। अबिरल वर्षाका कारण आएको बाढी, पहिरोमा परेर ८ जनाको मृत्यु भएको छ । नेपाल प्रहरीका केन्द्रीय प्रवक्ता एवं प्रहरी नायब महानिरीक्षक दानबहादुर कार्कीले गत जेठ २८ गतेदेखि देशका विभिन्न स्थानमा आएको बाढी, पहिरो लगायत विपद्मा मा परिआजसम्म एक सय ९० जनाको मृत्यु भइसकेकाे छ ।

प्रहरीबाट प्राप्त विवरण अनुसार काठमाण्डाै उपत्यकामा तीन, कोशी प्रदेशमा २७, मधेश प्रदेशमा आठ, बागमती प्रदेशमा ३२, गण्डकी प्रदेशमा ५६, लुम्बिनी प्रदेशमा ३६, कर्णाली प्रदेशमा १३ र सुदूरपश्चिम प्रदेशमा १५ जनाको ज्यान गएको छ ।

सोही अवधिमा एक सय १४ जनाको उद्धार गरिएको छ । बाढीपहिरोमा परी कोशी प्रदेशमा दुई, मधेश प्रदेशमा एक, बागमती प्रदेशमा ४१, गण्डकी प्रदेशमा दुई, लुम्बिनी प्रदेशमा एक, कर्णाली प्रदेशमा एक र सुदूरपश्चिम प्रदेशमा एक गरी ४९ जना बेपत्ता रहेको छ ।

भाद्र ३ साेमबार, काठमाण्डाै। सरकारले गौतमबुद्ध अन्तर्राष्ट्रिय विमानस्थल र पोखरा अन्तर्राष्ट्रिय विमानस्थललाई पूर्ण क्षमतामा सञ्चालनका गर्न कार्य योजना सहित प्रक्रिया अगाडि बढाएको छ ।

उद्योग, वाणिज्य तथा आपूर्ति मन्त्रालयले विज्ञप्ति मार्फत निगमको सञ्चालक समितिको बैठकले भदौ १ गतेदेखि लागू हुनेगरी हवाई इन्धनको बिक्री मूल्यमा प्रतिकिलोलिटर अमेरिकी डलर एक सय अर्को निर्णय नभएसम्मका लागि कम गर्ने निर्णय गरेको जनाएको छ ।

निर्माण सम्पन्न भएर लामो समयदेखि नियमित अन्तर्राष्ट्रिय उडान हुन नसकेका यि दुई विमानस्थल सञ्चालनका लागि सरकारले विभिन्न सेवामा एयरलाइन्सलाई सहुलियत लगायतका आकर्षक प्याकेज ल्याउने तयारी गरेकाे छ । यसलाइ पूर्ण क्षमतामा सञ्चालन गर्न हवाई इन्धनदेखि टिकट सहुलियत दिने पनि सरकारको योजना रहेकाेछ ।

संस्कृति, पर्यटन तथा नागरिक उड्डयन मन्त्रालयका अनुसार दुई अन्तर्राष्ट्रिय विमानस्थल पूर्ण क्षमतामा सञ्चालनमा ल्याउन हवाई टिकट, ग्राउन्ड ह्यान्डलिङ, हवाई इन्धनमा आगामी २०८३ साल भदौसम्म सहुलियत दिने कार्य योजना बनाएको छ ।

भाद्र ३ साेमबार, काठमाण्डाै। प्रधानमन्त्री केपी शर्मा ओलीले जनैपूर्णिमा पर्वको अवसरमा देशवासी सबैलाई शुभकामना व्यक्त गर्नुभएको छ । उहाँले सामाजिक सञ्जालमार्फत जनैपूर्णिमा, रक्षाबन्धन, ऋषि तर्पणी तथा राखी पर्वको अवरमा शुभकामना दिनुभएको हो ।

प्रधानमन्त्री ओलीले जनैपूर्णिमाका दिन गुरु पुरोहित, आफन्तजन एवं इष्टमित्रसँग जनै लगाउने र रक्षाबन्धन बाँध्नाले शत्रुबाट रक्षा हुने जनविश्वास रहिआएको बताउनुभयाे । उहाँले ब्रह्मकुमारी राजयोग सेवा केन्द्रका राजदिदीहरुबाट रक्षाबन्धन ग्रहण गर्नुभयो ।

प्रधानमन्त्री निवास बालुवाटारमा परिवारजनका अन्य सदस्यहरुले पनि रक्षाबन्धन ग्रहण गर्नुभएको प्रधानमन्त्रीको सचिवालयले जनाएको छ ।

भाद्र २ आइतबार, काठमाण्डाै। अविरल भारी वर्षाका कारण निसीखोला गाउँपालिका–६ सिपमा पहिरो खस्दा मध्यपहाडी लोकमार्गको बागलुङ–पूर्वीरुकुम सडक अवरुद्ध भएको छ ।

जिल्ला प्रहरी कार्यालयका सूचना अधिकारी विजय यादवले जानकारी दिए अनुसार लोकमार्ग अवरुद्ध हुँदा पूर्वीरुकुम, जाजरकोट लगायत जिल्लामा सञ्चालन हुने साना तथा ठूला सवारीसाधन ठप्प भएको छ ।

सडक अवरुद्ध हुनाले त्याहा वरपरका जनतालाई दैनिक जिवनयापनमा धेरै असर परेकाे छ । अवरुद्ध सडक खोल्ने प्रयास जारी रहेकाे छ ।

भाद्र १ शनिबार, काठमाण्डाै। सोलुखुम्बुकाे थामे क्षेत्रमा दुई हिमताल फुट्दा बाढी आएको बताइएकाे छ । रक्षामन्त्री मानवीर राई र राष्ट्रिय विपद् जोखिम न्यूनीकरण व्यवस्थापन प्राधिकरणका प्रमुख कार्यकारी अधिकृत अनिल पोखरेल सहितको टोलीले आज क्षतिग्रस्त थामे क्षेत्रको हवाई निरीक्षणपछि हिजो दुई वटा हिमताल फुटेकाले बाढी आएको र सो क्षेत्रमा बाढीको जोखिम कायमै रहेकाे जानकारी दिएकाे छ ।

विपद् व्यवस्थापन समितिले जोखिममा रहेका भनिएका हिमताल जोगाउन सक्ने सम्भावना कम रहेको जनाएको छ । थामे भन्दा माथिपट्टि पाँच वटा हिमताल रहेकाे छ, शुक्रबार दुईवटा विस्फोट भएपछि बाढी आएको पुष्टि भएकाे छ । प्रमुख जिल्ला अधिकारी खत्रीले बाँकी तीनमध्ये एउटा सुरक्षित रहेको र दुई वटा जोखिम रहेको बताउनुभयाे । खुम्बुसहित तल्लो सोलुमा बाढीको उच्च जोखिम रहेकाले सो क्षेत्रमा उच्च सावधानी अपनाउन आग्रह गरिएको पनि उहाँले बताउनुभयो ।

बाढीले खुम्बु पासाङल्हामु गाउँपालिका(३ फाक्दिङदेखि नाम्चे जाने पदमार्ग कटान गर्दा तल्लो क्षेत्रबाट सगरमाथा क्षेत्रमा आवतजावत टुटेको सगरमाथा प्रदूषण नियन्त्रण समिति नाम्चेका अध्यक्ष लामाकाजी शेर्पाले बताउनुभयो ।

भाद्र १ शनिबार, काठमाण्डाै । मुलुकी ऐन–१९१० को अंग्रेजीमा पुनर्व्याख्या सहितकाे पुस्तक प्रकाशित भएको छ । जर्मनीको हाइडलबर्ग विश्वविद्यालयमा दक्षिण एसियाली कानुनहरूको इतिहासबारे अनुसन्धानमा संलग्न टोलीले मुलुकी ऐन-१९१९ को पुनर्व्याख्या सहित अंग्रेजी भाषामा पुस्तक प्रकाशित गरेका हुन् । पुस्तकलाई ‘द मुलुकी ऐन अफ १८५४ : नेपालस् फर्स्ट् लिगल कोड’ नाम दिइएको छ ।

हाइडलबर्ग विश्वविद्यालयले उक्त पुस्तक सन् २०२१ मै प्रकाशित गरेको हो । पुस्तकको नेपाल संस्करण भने शुक्रबार विमोचन भएको छ । पुस्तकको नेपाल संस्करण वज्र बुक्सले प्रकाशन गरेको हो । शुक्रबार हाइडलबर्ग विश्वविद्यालय, दक्षिण एसियाली अध्ययन केन्द्रको नेपाल कार्यालयमा एक कार्यक्रमका बीच प्राध्यापक प्रयागराज शर्माले उक्त पुस्तक विमोचन गरेका हुन् ।

कार्यक्रममा उक्त विश्वविद्यालयबाट धर्मशास्त्रमा विद्यावारिधि गरेका राजन खतिवडा, सिमोन चुबेलिच् उक्त विश्वविद्यालयका वरिष्ठ प्राध्यापक आक्सेल् मिखाएल्स् समेतकाे सहभागी रहेकाे थियाे ।

श्रावण ३१ बिहिबार, काठमाण्डाै । अविरल वर्षाको कारण बाढी पहिरोमा परी मृत्यु हुनेकाे संख्या १७५ जना पुगेकाे छ । केन्द्रीय प्रहरी प्रवक्ता एवं प्रहरी नायब महानिरीक्षक दानबहादुर कार्कीले जानकारी दिए अनुसार गत जेठ २८ गते देखि देशका विभिन्न स्थानमा आएको बाढी पहिरोमा परी आज दिउँसोसम्म एक सय ७५ जनाको मृत्यु भएको छ ।

प्रहरी प्रवक्ता कार्कीका अनुसार पहिरो लगायत विपद्मा परी काठमाण्डाै उपत्यकामा तीन जना, कोशी प्रदेशमा २७ जना, मधेस प्रदेशमा आठ जना, बागमती प्रदेशमा ३१ जना, गण्डकी प्रदेशमा ५४ जना, लुम्बिनी प्रदेशमा ३३ जना, कर्णाली प्रदेशमा आठ जना र सुदूरपश्चिम प्रदेशमा ११ जनाको मृत्यु भएको छ ।

उहाँका अनुसार बाढीपहिराेबाट काठमाण्डाै उपत्यकामा ११ जना, कोशी प्रदेशमा ३७ जना, मधेस प्रदेशमा ११ जना, बागमती प्रदेशमा २३ जना, गण्डकी प्रदेशमा ४६ जना, लुम्बिनी प्रदेशमा १३ जना, कर्णाली प्रदेशमा ५५ जना र सुदूरपश्चिम प्रदेशमा २८ जना गरी जम्मा दुई सय २४ जना घाइते भएका छन् । साथै देशका विभिन्न स्थानबाट एक सय १३ जनाको उद्धार गरिएको पनि बताउनुभयो ।

श्रावण २७ आइतबार, काठमाण्डाै । बाढी पहिरोका कारण बडिगाडमा ५० परिवार विस्थापित भएका छन् । पहिरोमा परी ११ जनाको मृत्यु भएको छ भने एक जनाको अवस्था अझै अज्ञात छ ।

पहिरोका कारण खानेपानी, विधुत आपूर्ति हुनसकेको छैन । विस्थापित परिवारको अहिले बिचल्ली भएको छ । बालबालिका र वृद्धवृद्धालाई बढी समस्या परेको छ । प्रभावित क्षेत्रहरु बडिगाड गाउँपालिका–९ को नयाँबस्ती र वडा नं १० आरुपाता, पात्ले, क्लावझिङ, खोर, सल्लेनधारा लगायतका बस्ती रहेकाछन् ।

बडिगाड गाउँपालिकाका उपाध्यक्ष भीमसेन वनले दिनुभएकाे जानकारी अनुसार विस्थापित परिवारलाई विद्यालय तथा सार्वजनिक स्थलमा व्यवस्थापन गरेकाे छ । गाउँपालिकाबाट प्रारम्भिक चरणको राहत वितरण कार्य भइरहेकाेछ । पालिकाले खाद्यान्न र त्रिपाल, बत्तीलगायत अतिआवश्यक सामग्री उपलब्ध गराएको र दीर्घकालीन व्यवस्थापनका लागि माथिल्लो तहको सरकारसँग छलफल गरिरहेकोछ।

श्रावण २५ शुक्रबार, काठमाण्डाै । नेपाल विधुत प्राधिकरणका कार्यकारी निर्देशक कुलमान घिसिङले डेडिकेटेड र ट्रंक लाइन विधुतको महशुल जोडेर प्राधिकरणले नाफा नदेखाएको बताउनुभयाे । शुक्रबार प्राधिकरणमा दोस्रो पटक जिम्मेवारी सम्हालेको निर्देशक घिसिङले तीन वर्षे उपलब्धि सार्वजनिक गर्दै बताउनु भएकाे हाे।

कार्यकारी निर्देशक घिसिङले प्राधिकरणले विगत ८ वर्षमा ३५ अर्बको सञ्चित घाटा बेहोरिरहेकोमा आफू नियुक्त भएपछि त्यसलाई पूर्ति गरेर ४७ अर्ब सञ्चित नाफामा पुर्‍याएको बताउनुभयाे । उनले तीन वर्षको अवधिमा प्राविधिक र गैरप्राविधिक विधुत चुहावट घटाउन, अधिकतम ग्राहकसम्म पहुँच बढाउन, वित्तीय खर्च घटाउन, राजश्व बढाउन, प्रशारण तथा वितरण लाइन र सबस्टेसन बिस्तार गर्न संस्थागत सुशासनमा सुधार गर्दै नाफा कमाउनमा प्राधिकरणलाई ठूलो सफलता हात परेको बताउनुभयाे ।

उनका अनुसार तीन वर्षअघि विधुतीकरणको अवस्था करिब ५८ प्रतिशत रहेकोमा तीन वर्षको अवधिमा ९९ प्रतिशत पुगेको छ। हाल ५९ लाख ३५ हजार ग्राहक रहेको र प्राधिकरणले विकट बस्तीहरुको पहिचान गरेर बाँकी विधुतीकरणको कार्य अगाडि बढाइ सकेको , अब देश छिट्टै पूर्णरुपमा विधुतीकरण घोषणा गर्ने अवस्थामा पुगेको जानकारी दिनुभयाे ।

श्रावण २४ बिहिबार, काठमाण्डाै । सर्वोच्च अदालतले नेपाल विधुत प्राधिकरणका सञ्चालक समितिका सदस्य द्वय भक्तबहादुर पुन र कपिल आचार्यलाई हटाउने सरकारको निर्णय कार्यान्वयन नगर्न अन्तरिम आदेश दिएको छ । सर्वोच्च अदालतका न्यायाधीश सुनिलकुमार पोखरेलको एकल इजलासले आज उक्त आदेश दिएको हो । अदालतले सदस्य द्वय पुन र आचार्यलाई हटाउनुको कारण माग गरेको छ ।

प्राधिकरणका सञ्चालक समितिका सदस्यद्वय पुन र आचार्यले आफूहरूलाइ सरकारले गैरकानुनी तरीकाले हटाएको भन्दै बुधबार सर्वोच्चमा रिट दायर गर्नुभएको थियो । बिहीबार बसेकाे इजलासले दुई सदस्यको माग बमोजिम अन्तरिम आदेश जारी भएको छ ।

डेडिकेटेड र ट्रङ्क लाइनको महसुल विवादमा उहाँहरूले प्राधिकरणको निर्णय विरुद्ध फरक मत राख्नुभएको थियो । फरक मत राखेपछि ऊर्जामन्त्री खडकाले उहाँहरूलाई यही साउन १५ गते स्पष्टीकरण सोध्नुभएको थियो । स्पष्टीकरण चित्तबुझ्दो नभएको भन्दै मन्त्री खड्काले मन्त्रि स्तरीय निर्णय गर्दै साउन १८ गते सञ्चालक समिति सदस्यबाट सदस्यद्वय पुन र आचार्यलाइ हटाएकाे थियाे । भने साउन २० गते सञ्चालक समितिमा देवेन्द्र कार्की र महेन्द्रबहादुर गुरुङलाई नियुक्त गरिएको थियो ।

श्रावण २२ मंगलबार, काठमाण्डाै । अविरल वर्षाका कारण बाढी, पहिरो लगायतका घटनामा परी आज मात्रनै देशका विभिन्न जिल्लामा ११ जनाको मृत्यु भएको छ । यो सँगै अविरल वर्षाका कारण गत जेठ २८ गते देखि देशका विभिन्न स्थानमा आएको बाढी, पहिरोमा परी हालसम्म एक सय ६५ जनाको मृत्यु भएको छ । हिजोसम्म एक सय ५४ जनाको मृत्यु भएको थियो ।  

प्रहरी प्रवक्ता प्रहरी नायब महानिरीक्षक दानबहादुर कार्कीले जानकारी दिए अनुसार आज बागलुङ र गुल्मीमा बढी मानवीय क्षति भएको छ । बाढी, पहिरोलगायतका विपद्मा परी काठमाडौँ उपत्यकामा तीन, कोशी प्रदेशमा २५, मधेस प्रदेशमा छ, बागमती प्रदेशमा ३०, गण्डकी प्रदेशमा ५०, लुम्बिनी प्रदेशमा ३३, कर्णाली प्रदेशमा आठ र सुदूरपश्चिम प्रदेशमा १० जना गरी हालसम्म एक सय ६५ जनाको मृत्यु भएको प्रहरीले जनाएको छ । 

विपद्मा परी आजसम्म एक सय ९८ जना घाइते भएका छन् भने एक सय ५१ जना बेपत्ता भएका छन् । प्रहरी प्रवक्ता कार्कीले आज मात्रै थप चार जना बेपत्ता भएका जानकारी दिनुभयो । उक्त अवधिमा विपदका घटनाबाट चार हजार दुई सय ५९ घर परिवार विस्थापित भएका छन् ।

श्रावण २१ साेमबार, काठमाण्डाै । राष्ट्रपति रामचन्द्र पौडेलले राज्यले प्रजातन्त्रका सेनानीहरूको त्याग र सङ्घर्षको उचित कदर र सम्मान गर्नुपर्ने बताउनुभयाे । प्रजातन्त्रका लागि सङ्घर्ष गरेका प्रजातन्त्रका सेनानीहरूसँग सोमबार राष्ट्रपति भवन शीतल निवासमा भएको भेटमा राष्ट्रपति पौडेलले सो धारणा व्यक्त गर्नुभएको थियाे ।

उँहाले प्रजातन्त्र स्थापना र पुनर्स्थापनाको अविश्राम र अथक सङ्घर्षका कष्टकर क्षण व्यतीत गर्ने सेनानीहरूको त्याग र सङ्घर्ष राज्यले बिर्सिनु नहुने बताउनु भयाे। सेनानीहरूले विगतमा गर्नुभएको योगदानको कदर गर्दै उहाँहरूलाई सरकार र सम्बन्धित निकायले दिनुपर्ने सम्मान, सुविधा र सहयोगमा कुनै कन्जुस्याइँ नहुने पनि व्यक्त गर्नुभयाे ।

उहाले राजनीतिक स्थायित्व, सुशासन र जनताको आकाङ्क्षा पुरा हुन सके मात्र मुलुक विकासको बाटोमा अघि बढ्ने, हामीले अपनाएको शासन प्रणाली सुदृढ हुने र लोकतान्त्रिक मूल्य मान्यता, आदर्श र निष्ठाका साथ हाम्रा अग्रजहरूले गरेको त्याग र सङ्घर्षले सार्थकता पाउने बताउनु भयो ।