प्रजातन्त्रका सेनानीहरूको त्याग र सङ्घर्षको उचित कदर र सम्मान गर्नुपर्छ- राष्ट्रपति रामचन्द्र पौडेल

श्रावण २१ साेमबार, काठमाण्डाै । राष्ट्रपति रामचन्द्र पौडेलले राज्यले प्रजातन्त्रका सेनानीहरूको त्याग र सङ्घर्षको उचित कदर र सम्मान गर्नुपर्ने बताउनुभयाे । प्रजातन्त्रका लागि सङ्घर्ष गरेका प्रजातन्त्रका सेनानीहरूसँग सोमबार राष्ट्रपति भवन शीतल निवासमा भएको भेटमा राष्ट्रपति पौडेलले सो धारणा व्यक्त गर्नुभएको थियाे ।

उँहाले प्रजातन्त्र स्थापना र पुनर्स्थापनाको अविश्राम र अथक सङ्घर्षका कष्टकर क्षण व्यतीत गर्ने सेनानीहरूको त्याग र सङ्घर्ष राज्यले बिर्सिनु नहुने बताउनु भयाे। सेनानीहरूले विगतमा गर्नुभएको योगदानको कदर गर्दै उहाँहरूलाई सरकार र सम्बन्धित निकायले दिनुपर्ने सम्मान, सुविधा र सहयोगमा कुनै कन्जुस्याइँ नहुने पनि व्यक्त गर्नुभयाे ।

उहाले राजनीतिक स्थायित्व, सुशासन र जनताको आकाङ्क्षा पुरा हुन सके मात्र मुलुक विकासको बाटोमा अघि बढ्ने, हामीले अपनाएको शासन प्रणाली सुदृढ हुने र लोकतान्त्रिक मूल्य मान्यता, आदर्श र निष्ठाका साथ हाम्रा अग्रजहरूले गरेको त्याग र सङ्घर्षले सार्थकता पाउने बताउनु भयो ।