भुकम्प पीडित चिसोबाट थप पीडित छन् – मन्त्री बस्नेत

कार्तिक २३ बिहिबार, काठमाण्डाै । ऊर्जा, जलस्रोत तथा सिँचाइमन्त्री शक्ति बहादुर बस्नेतले भूकम्पबाट पीडित भएका जनता चिसाेले थप पीडित भएकाे बताउनुभयाे । प्रतिनिधिसभाको राज्यव्यवस्था तथा सुशासन समितिको सहभागितामा भएको अन्तरक्रियामा कार्यक्रममा उहाँले सरकारले पीडितहरुलाई चिसो तथा हिमपातबाट जोगाउने कार्य प्राथमिकताका साथ अगाडी बढाएकाे बताउनुभयाे ।

मन्त्री बस्नेतले यसअघि आएका भूकम्पको समयमा गरिएका सिकाइलाई जाजरकोटमा भएको क्षतिसँग जोडेर पुनःनिर्माणको कामलाई अभियानका रुपमा अगाडि बढाइने पनि बताउनुभयो । पुनःनिर्माणको अभियानमा सबै निकायको भूमिका महत्वपूर्ण हुने र तत्कालका लागि राहत व्यवस्थापन महत्वपूर्ण रहेको पनि उल्लेख गर्नुभयो ।

उनका अनुसार राहत सामग्री बोक्नका लागि ठूलो हेलिकप्टर प्रयोग गर्न खोजिए पनि अवतरणमा समस्या भएकोले सानो हेलिकप्टर प्रयोग गर्नु परेकाे छ । जसले गर्दा राहत व्यवस्थापनमा ढिला भएको बताउनुभयो । साथै प्राप्त सामग्री सदरमुकामबाट सबै ठाउँका लागि पठाइएको पनि बताउनुभयाे । तर पठाइएका सामग्रीहरु सदरमुकामबाट पालिकाको केन्द्र, पालिकाको केन्द्रबाट वडा कार्यालय र वडा कार्यालयबाट हुँदै पीडितसम्म पुग्नका लागि ढिलाे भएकाे बताउनुभयो । साथै उहाँका अनुसार बारेकोट, कुशे गाउँपालिकामा खाद्यान्नभन्दा पनि त्रिपालको समस्या बढी देखिएको पनि बताउनुभयो ।

मन्त्री बस्नेतले दुःखमा साथ र सहयाेग दिने, सल्लाह, सुझाव र हौसला दिने सबैलाई धन्यवाद दिनुभयो । साथै आपतकाे समयमा दिनरात नभनी सुरक्षा गरि साथ दिने सुरक्षाकर्मी मित्रको योगदानलाई भुल्नै नसक्ने भन्दै विशेष धन्यवाद पनि दिनुभयो ।